കൊച്ചി: ബിജെപി എറണാകുളം പാര്ലമെന്റ് മണ്ഡലം സ്ഥാനാര്ത്ഥി എ.എന്. രാധാകൃഷ്ണന്റെ പറവൂര് മണ്ഡലത്തിലെ സ്ഥാനാര്ത്ഥി പര്യടനത്തിന് ആവേശകരമായ പരിസമാപ്തി. ഇന്നലെ രാവിലെ 9.30 ഓടെ മാഞ്ഞാലിയില് നിന്നാംരംഭിച്ച പര്യടനം ജില്ലാ വൈസ് പ്രസിഡന്റ് എം. രവി ഉദ്ഘാടനം ചെയ്തു. അജി പൊട്ടാശേരി അധ്യക്ഷനായിരുന്നു. ജില്ലാ പ്രസിഡന്റ് പി.ജെ. തോമസ്്, കെ.പി. രാജന്, സഹജാ ഹരിദാസ്, ഇ.എസ്. പുരുഷോത്തമന്, പി.ജി. വിജയന്, ജി. ദിലീപ് , ടി.എസ്. സുരേഷ്, സോമന് ആലപ്പാട്ട്, സുധീര് ഗോപി തുടങ്ങിയവര് പങ്കെടുത്തു. കോണ്ഗ്രസ് ഭരണകാലത്ത് വര്ധനയുണ്ടാകുന്നത് നിത്യോപയോഗ സാധനങ്ങളുടെ വിലക്ക് മാത്രമാണെന്ന് സ്വീകരണത്തിന് നന്ദി പറഞ്ഞു കൊണ്ട് എ.എന്. രാധാകൃഷ്ണന് കുറ്റപ്പെടുത്തി. ഇന്ധനവും പാചകവാതകവും ഉള്പ്പെടെയുള്ളവയുടെ വിലവര്ധനവ് സാധാരണക്കാരന് താങ്ങാവുന്നതിലും അപ്പുറമായിക്കഴിഞ്ഞെന്നും യുപിഎ ഭരണത്തിന് അറുതി വരുത്തുക എന്നതാണ് ഇതിനൊരു പോംവഴിയെന്നും അദ്ദേഹം കൂട്ടിച്ചേര്ത്തു.
വാദ്യമേളങ്ങളുടെയും റോഡ് ഷോയുടെയും അകമ്പടിയോടെയായിരുന്നു സ്ഥാനാര്ത്ഥി പര്യടനം നീങ്ങിയത്. പറവൂര് നിയോജകമണ്ഡലത്തിലെ പുത്തന്വേലിക്കര, ചേണ്ടമംഗലം പഞ്ചായത്തുകളും പറവൂര് ടൗണും രണ്ടംഘട്ട പ്രചാരണ പരിപാടിയില് ഉള്പ്പെട്ടിരുന്നു. കാവടി, ചെണ്ടമേളം, നൂറോളം ബൈക്കുകളടങ്ങിയ റോഡ്ഷോ, സ്ഥാനാര്ത്ഥിയുടെ ചിത്രമടങ്ങുന്ന മുഖം മൂടി ധരിച്ച പ്രവര്ത്തകരുടെ റാലി എന്നിവയുടെ പശ്ചാത്തലത്തില് രാത്രി ഒമ്പത് മണിയോടെ പറവൂര് ടൗണില് പര്യടനം സമാപിച്ചു. ഇന്ന് തൃപ്പൂണിത്തുറ മണ്ഡലത്തിലെ രണ്ടാം ഘട്ട സ്ഥാനാര്ത്ഥി പര്യടനം പൂണിത്തുറ ഗാന്ധി സ്ക്വയറില് രാവിലെ 9 ന് ആരംഭിക്കും.
