എരുമേലി: ശബരിമല തീര്ത്ഥാടനത്തിന്റെ പേരില് സര്ക്കാര് വക ലക്ഷങ്ങളുപയോഗിച്ച് ദുര്വിനിയോഗത്തിലൂടെ മമ്പാടി എസ്റ്റേറ്റില് ചെക്കുഡാം നിര്മ്മിക്കാനുള്ള നീക്കം വിവാദമാകുന്നു. കോട്ടയം – പാമ്പാടി മൈനര് ഇറിഗേഷന്റെ മേല്നോട്ടത്തിലാണ് എരുമേലി ഗ്രാമപഞ്ചായത്ത് അതിര്ത്തിമേഖലയായ മഞ്ഞളരുവിയില് മമ്പാടി എസ്റ്റേറ്റിനുള്ളില് വന് ചെക്കുഡാം നിര്മ്മിക്കുന്നത്. 13 മീറ്റര് നീളത്തിലും മൂന്നുമീറ്റര് വീതിയിലുമായി 51 ലക്ഷം രൂപ ചെലവഴിച്ചാണ് പദ്ധതി നടപ്പാക്കുന്നതെന്നും ഇറിഗേഷന് മൈനര് വിഭാഗം പറയുന്നു. എന്നാല് ശബരിമല തീര്ത്ഥാടകര്ക്കായി അടിസ്ഥാന സൗകര്യങ്ങള് ഒരുക്കുന്നതിന്റെ ഭാഗമായി സംസ്ഥാന പാതയിലെ മഞ്ഞളരുവി പാലത്തിനു സമീപം ചെക്കുഡാം നിര്മ്മിക്കാനുള്ള പദ്ധതിയാണ് എസ്റ്റേറ്റ് ഉടമയ്ക്കായി സ്ഥലം മാറ്റിയതെന്നും നാട്ടുകാര് പറയുന്നു. ഇറിഗേഷന് തിരുവനന്തപുരം ഓഫീസില് നിന്നുള്ള നടപടി ക്രമങ്ങളാണുണ്ടായതെന്നും പ്രാദേശികമായോ ജില്ലാ – താലൂക്ക് ഇറിഗേഷന് ഭരണകൂടങ്ങള്ക്ക് യാതൊരു ബന്ധവും ഇല്ലായെന്നും അധികൃതര് വ്യക്തമാക്കുന്നു.മഞ്ഞളരുവി മേഖലയില് താമസിക്കുന്ന നൂറുകണക്കിനു കര്ഷകരടക്കമുള്ള താമസക്കാര്ക്ക് കുടിവെള്ളം മുട്ടിക്കാനുള്ള സാഹചര്യമാണ് ചെക്കുഡാം നിര്മ്മാണത്തിലൂടെ ഉണ്ടാകാന് പോകുന്നതെന്ന് നാട്ടുകാരും പറയുന്നു.
ചെക്കുഡാം നിര്മ്മാണത്തിനെതിരെ എരുമേലി ഗ്രാമപഞ്ചായത്തംഗം ടി.പി.തൊമ്മി പരാതിയും നല്കിയിട്ടുണ്ട്. എരുമേലിയിലെ പ്രധാനജലസ്രോതസ്സായ മണിമലയാറിലേയ്ക്ക് എത്തുന്ന മമ്പാടി എസ്റ്റേറ്റിലൂടെ ഒഴുകുന്ന കൊച്ചുതോടിനു കുറുകെയാണ് വന് ചെക്കുഡാം ലക്ഷങ്ങള് മുടക്കി നിര്മ്മിക്കുന്നത്. കോടികളുടെ ആസ്തിയുള്ള എസ്റ്റേറ്റ് ഉടമകള് സര്ക്കാര് വക ഫണ്ട് ഉപയോഗിക്കുന്നതിനെതിരെ സമീപപ്രദേശങ്ങളിലുള്ളവരില് പ്രതിഷേധങ്ങള്ക്കും വഴിയൊരുക്കിയിരിക്കുകയാണ്.
