141. പൃഥഃ – വേനന്റെ കൈകടഞ്ഞപ്പോള് അവതരിച്ച ഭഗവാന് മുനിമാര് നല്കിയ സാര്ഥകമായ നാമം. പൃഥു എന്ന പദത്തിന് വലിയവന്, ശ്രേഷ്ഠന്, ബുദ്ധിമാന്, സമര്ഥന് എന്നൊക്കെ അര്ഥം. പൃഥു ചക്രവര്ത്തി ഇതൊക്കെ ആയിരുന്നുവെന്ന് പുരാണങ്ങള് പറയുന്നു. തുടര്ന്ന് നാമങ്ങള് ഇക്കാര്യം വിവരിക്കുന്നു.
142. പൃഥുലവിക്രമഃ – വര്ധിച്ച പരാക്രമമുള്ളവന്. പൃഥുലം എന്നപദത്തില് വലുത്, വിസ്തൃതമായ് എന്നര്ഥം. പൃഥുവിനോളം പരാക്രമിയായി മറ്റൊരു രാജാവുണ്ടായിട്ടില്ല. ഭൂമിയുടെ അല്പ്പാംശം ഏതെങ്കിലും രാജ്യത്തിലും സാമ്രാജ്യത്തിലും ആധിപത്യം നേടിയാണ് രാജാക്കന്മാര് പരാക്രമം പ്രദര്ശിപ്പിക്കുന്നത്.
പൃഥുചക്രവര്ത്തി ഭൂമിയെത്തന്നെ കീഴടക്കി. തന്റെ വില്ലിന്റെ അറ്റംകൊണ്ട് ധൂരങ്ങളായ പര്വതങ്ങളുടെ അറ്റങ്ങള് തട്ടിനിരത്തി ജനവാസയോഗ്യമായ ഭൂഭാഗങ്ങളുണ്ടാക്കി. വേനന്റെ അധര്മം സഹിക്കാനാകാതെ ഭൂമി തന്റെ ഉള്ളില് ഒളിപ്പിച്ച ധാന്യാദിവിഭവങ്ങളെ ജനങ്ങള്ക്ക് കിട്ടുമാറാക്കി. ഒടുവില് ഭൂമിയെത്തന്നെ മകളായി സ്വീകരിച്ചു. പൃഥുവിന്റെമകളെന്ന അര്ഥത്തില് ഭൂമിക്ക് പൃഥ്വി എന്നു പേരുണ്ടായി.
143: ഗോരൂപിണീമഹീദോഗ്ധാ: പശുവിന്റെ രൂപം ധരിച്ച് ഭൂമിയെ കറന്നവന്. വിഭവങ്ങളെ ഭൂമി തന്റെ ഉള്ളില് ഒളിപ്പിച്ചതിനാല് ജീവികള് ആഹാരമില്ലാതെ അവശരായി ഇതറിഞ്ഞു കോപിച്ച പൃഥു ഭൂമിയെ ശിക്ഷിക്കാനായി വില്ലില് അമ്പുതൊടുത്തു. ഭൂമി ഒരു പശുവിന്റെ രൂപത്തില് ഓടിരക്ഷപ്പെടാന് ശ്രമിച്ചു. പോയിടത്തെല്ലാം ചക്രവര്ത്തി ഭൂമിയെ പിന്തുടര്ന്നു. ഒളിക്കാന് ഇടമില്ലാതെ ഓടിത്തളര്ന്ന ഭൂമി സമ്പത്തുക്കള് പാലിന്റെ രൂപത്തില് കറന്നെടുത്തുകൊള്ളാ ന് രാജാവിനെ അനുവദിച്ചു. അതനുസരിച്ച് ഭൂമിയില് നിന്ന് സമ്പത്തു കറന്നെടുത്തവന്.
(തുടരും)
ഡോ. ബി.സി.ബാലകൃഷ്ണന്
