സിഡ്നി: ആഷസില് ഇംഗ്ലണ്ട് ദുരന്തത്തിന്റെ സമ്പൂര്ണ ചിത്രമായിത്തീര്ന്നു. തുടര്ച്ചയായ അഞ്ചാം ടെസ്റ്റിലും വമ്പന് ജയം സ്വന്തമാക്കിയ ഓസ്ട്രേലിയ ഇംഗ്ലീഷ് പടയെ വൈറ്റ്വാഷ് ചെയ്തു (5-0). സിഡ്നിയിലെ അങ്കത്തില് 281 റ ണ്സുകള്ക്കാണ് കങ്കാരുക്കള് സന്ദര്ശകരെ നിഷ്പ്രഭമാക്കിയത്. 448 റണ്സിന്റെ വിജയലക്ഷ്യം തേടിയ അലിസ്റ്റര് കുക്കും സംഘവും മൂന്നാം ദിനം വെറും 166ന് ഓള് ഔട്ടായി. അഞ്ച് വിക്കറ്റുകള് വീഴ്ത്തിയ പേസര് ഋയാന് ഹാരിസ് ഇംഗ്ലണ്ടിന്റെ അന്ത്യകര്മ്മങ്ങള്ക്ക് നേതൃത്വം നല്കി. മിച്ചല് ജോണ്സന്റെ പന്തുകളും (3 വിക്കറ്റും) ഒരിക്കല്ക്കൂടെ ഇംഗ്ലണ്ടിന് തലവേദ തീര്ത്തു. ഹാരിസ് കളിയിലെ കേമന് പട്ടം കൈക്കലാക്കി. പരമ്പരയിലാകെ 37 വിക്കറ്റുകള് പിഴുത ജോണ്സന് മാന് ഓഫ് ദ സീരിസ്. ആഷസിന്റെ ചരിത്രത്തിലെ മൂന്നാമത്തെ വൈറ്റ്വാഷാണിത്. മൂന്നു തവണയും പരാജിതരുടെ വേഷത്തില് നിന്നത് ഇംഗ്ലണ്ടും. 1920-21, 2006-07 സീസണിലും ഇംഗ്ലണ്ട് 5-0ത്തിന് തൂത്തെറിയപ്പെട്ടു. സ്കോര്: ഓസ്ട്രേലിയ- 326, 276. ഇംഗ്ലണ്ട് -155, 166.
ഓസീസ് ബൗളര്മാര് വരച്ചവരയില് നിന്ന് ഒരടി മുന്നോട്ടുവയ്ക്കാന് ഇത്തവണയും ഇംഗ്ലീഷ് ബാറ്റ്സ്മാന്മാര്ക്കായില്ല. 32 ഓവറില് ഇംഗ്ലണ്ടിന്റെ കഥകഴിഞ്ഞു.
കുക്കിന് (7) ബ്രാഡ് ഹാഡിന്റെ ഗ്ലൗസില് വിശ്രമം ഒരുക്കി ജോണ്സനാണ് വേട്ടയാരംഭിച്ചത്. ഇയാന് ബെല് (16), കെവിന് പീറ്റേഴ്സന് (6) എന്നിവരെ ഹാരിസ് വാഴാന് അനുവദിച്ചില്ല. 43 റണ്സുമായി പൊരുതിയ മൈക്കല് കാര്ബറിയെയും ജോണ്സന് തന്റെ ഇരയാക്കി. ഗ്യാരി ബാലന്സിനും (7) ജോണ്സന്റെ വേഗതയെ അതിജീവിക്കാന് ശേഷിയുണ്ടായിരുന്നില്ല.
ജോണി ബെയര്സ്റ്റോ (0), സ്കോട്ട് ബോര്ത്വിക് (4) എന്നിവര് നതാന് ലയോണിന്റെ സ്പിന് വിദ്യകളെ പ്രണമിച്ചു. ഈ ഘട്ടത്തില് 7ന് 95 എന്ന നിലയില് ഇംഗ്ലണ്ട് കൂപ്പുകുത്തി. എന്നാല് സ്റ്റ്യുവര്ട്ട് ബ്രോഡും (42) ബെന് സ്റ്റോക്സും (32) ചെറുത്തു നിന്നതോടെ ഇംഗ്ലണ്ട് 150 കടന്നു. നേരത്തെ, ഓസീസിന്റെ രണ്ടാം ഇന്നിങ്ങ്സ് 276ല് അവസാനിച്ചു. ഓപ്പണര് ക്രിസ് റോജേഴ്സ് (119) സെഞ്ച്വറി നേടി. 15 ബൗണ്ടറികള് അടങ്ങുന്നതായിരുന്നു റോജേഴ്സിന്റെ ഇന്നിങ്ങ്സ്. ജോര്ജ് ബെയ്ലിയും (46) തരക്കേടില്ലാത്ത സംഭാവന നല്കി.
