പെര്ത്ത്: ഡേവിഡ് വാര്ണറുടെ (112) തകര്പ്പന് സെഞ്ച്വറിയുടെ ബലത്തില് ആഷസ് പരമ്പരയിലെ മൂന്നാം ടെസ്റ്റിലും ഓസ്ട്രേലിയ ആധിപത്യം ഉറപ്പിച്ചു. ആദ്യ ഇന്നിങ്ങ്സില് ഇംഗ്ലണ്ടിനെ 251 പുറത്താക്കിയ കങ്കാരുക്കള് രണ്ടാംവട്ടത്തില് മൂന്നുവിക്കറ്റ് നഷ്ടത്തില് 235 റണ്സ് അടിച്ചെടുത്തു. മൂന്നാം ദിനം കളിയവസാനിപ്പിക്കുമ്പോള് ആതിഥേയര്ക്ക് 369 റണ്സിന്റെ ഓവറോള് ലീഡുണ്ട്. പരാജയം ഒഴിവാക്കാന് ഇംഗ്ലണ്ട് ഭഗീരഥ പ്രയത്നം നടത്തേണ്ടിവരുമെന്നത് ഉറപ്പായി. മിച്ചല് ജോണ്സന്റെ പന്തുകൊണ്ടു കാല്പ്പാദത്തിനു പരിക്കേറ്റ് സ്ട്രൈക്ക് ബൗളര് സ്റ്റ്യുവര്ട്ട് ബ്രോഡ് കരകയറിയതും ഇംഗ്ലണ്ടിന്റെ നില പരുങ്ങലിലാക്കിയിട്ടുണ്ട്. സ്കോര്: ഓസ്ട്രേലിയ-385, 235/3. ഇംഗ്ലണ്ട്-251.
ഏകദിന ശൈലിയില് ബാറ്റു വീശിയ വാര്ണര് അക്ഷരാര്ത്ഥത്തില് പെര്ത്തിനെ തീപിടിപ്പിക്കുകയായിരുന്നു. കട്ടുകളും ഡ്രൈവുകളും യഥേഷ്ടം ഉതിര്ത്ത ഓസീസ് ഓപ്പണര് ഇംഗ്ലീഷ് ബൗളര്മാരെ ഹതാശരാക്കിക്കളഞ്ഞു. അര്ധശതകം തികച്ച ക്രിസ് റോജേഴ്സും (54) വാര്ണര്ക്ക് പറ്റിയ കൂട്ടാളിയായി. ഒന്നാം വിക്കറ്റില് ഇരുവരും 157 റണ്സ് ചേര്ത്തു. ഒടുവില് റോജേഴ്സിനെ മടക്കി ടിം ബ്രസ്നന് ഈ സഖ്യംപൊളിച്ചു. എട്ടു ഫോറുകള് തൊടുത്തശേഷമായിരുന്നു റോജേഴ്സിന്റെ കരകയറ്റം.
17 ബൗണ്ടറികളും രണ്ടു സിക്സറും പറത്തിയ വാര്ണറെ ഗ്രെയിം സ്വാനും തിരിച്ചയച്ചു. ക്യാപ്റ്റന് മൈക്കല് ക്ലാര്ക്ക് (23) തിളങ്ങിയില്ല. ഷെയ്ന് വാട്സനും (29) സ്റ്റീവന് സ്മിത്തും (5) ക്രീസിലുണ്ട്. രാവിലെ ബാറ്റിങ് പുനരാരംഭിച്ച ഇംഗ്ലണ്ടിന് അത്ഭുതങ്ങളൊന്നും കാട്ടാന് സാധിച്ചില്ല. 71 റണ്സ് ചേര്ക്കുന്നതിനിടെ അവരുടെ അവശേഷിച്ച ആറു വിക്കറ്റുകളും നിലംപൊത്തി. ഇയാന് ബെല് (15), ബെന് സ്റ്റോക്സ് (18), മാറ്റ് പ്രിയോര് (8), ബ്രോഡ് (5) എന്നിവരെല്ലാം വന്നപാടെ മടങ്ങി. ഓസീസിനുവേണ്ടി പീറ്റര് സിഡിലും ഋയാന് ഹാരിസും മൂന്നു വിക്കറ്റുകള് വീതം വീഴ്ത്തി. ജോണ്സന് രണ്ടിരകളെ കണ്ടെത്തി.
