പുരസ്കാരങ്ങളുടെ രാജകുമാരി. ആരാണ് ആലീസ് മണ്റോ എന്ന ചോദ്യത്തിന് ആദ്യം ലഭിക്കുന്ന ഉത്തരം ഇതായിരിക്കും. ലോകോത്തരമായ പുരസ്കാരങ്ങളുടെ പടികള് ചവിട്ടിക്കയറിയാണ് ആലീസ് വരുന്നത്. 2009 ല് സമഗ്ര സംഭാവനക്കുള്ള ബുക്കര് പ്രൈസ്. 1968, 1978, 1986 എന്നീ വര്ഷങ്ങളില് സാഹിത്യത്തില് കാനഡ സര്ക്കാര് നല്കുന്ന ഗവര്ണര് ജനറല് പുരസ്കാരം. ചെറുകഥക്കുള്ള ഒ. ഹെന്റി പുരസ്കാരം 2006 ലും 2008 ലും ആലീസിന്റെ കഥകളായ ‘പാഷ’നും ‘വാട്ട് ഡു യു വാണ്ട് ടു നോ യു’വും കരസ്ഥമാക്കി.
‘വിസ്മയകരമായത് ചിലത് അനുഭവിക്കാന്’ വായനക്കാരെ ആവശ്യമുണ്ടെന്ന് 2010 ലെ ഒരു അഭിമുഖത്തില് പറഞ്ഞ ആലീസ് എന്ത് സംഭവിച്ചു എന്നതിലല്ല, എങ്ങനെ സംഭവിച്ചു എന്നതിലാണ് എഴുത്തിന്റെ രഹസ്യം തേടുന്നത്. നോവലിനേക്കാള് നീണ്ടകഥകളാണ് ആലീസ് ഇതിനായി തെരഞ്ഞെടുത്തത്. കഥകളുടെ സൗന്ദര്യം കണ്ട് റഷ്യന്-അമേരിക്കന് കഥാകൃത്ത് സിന്തിയ ഒസിക് ആണ് കനേഡിയന് ചെക്കോവ് എന്ന് ആലീസിനെ ആദ്യമായി വിളിച്ചത്. 1996 ല് പ്രസിദ്ധീകരിച്ച കഥാസമാഹാരത്തിലെ കഥകളോരോന്നും പത്തൊമ്പതാം നൂറ്റാണ്ടിലെ റഷ്യന് എഴുത്തുകാരന് ആന്റണ് ചെക്കോവിന്റെ നേരവകാശിയാക്കി ആലീസിനെ മാറ്റുന്നു.
തന്റെ എഴുത്തില് സാധാരണക്കാര് വന്നുനിരക്കുന്നത് എന്തുകൊണ്ട് എന്ന് ചോദിച്ചപ്പോള് “അവരൊന്നും എനിയ്ക്ക് സാധാരണക്കാരല്ല. അവരൊക്കെ വലുതായി എന്തൊക്കെയോ ആഗ്രഹിക്കുന്നവരാണ്” എന്നായിരുന്നു ആലീസിന്റെ മറുപടി. കാനഡയിലെ ജന്മനാടായ തെക്കന് ഒന്റാറിയോയില്നിന്ന് ആലീസിന്റെ കഥകളിലേക്ക് നടന്നുകയറിയവര് വലിയ സാധാരണക്കാര് തന്നെയായിരുന്നു.
