ന്യൂദല്ഹി: രാജീവ് ഗാന്ധി വധത്തിലെ നിര്ണായക വീഡിയോ ദൃശ്യങ്ങള് രഹസ്യാന്വേഷണ വിഭാഗം തലവന് എം.കെ നാരായണന് പൂഴ്ത്തിയതായി ആരോപണം. രാജീവ് ഗാന്ധി വധക്കേസിലെ മുഖ്യ അന്വേഷണ ഉദ്യോഗസ്ഥനായ കെ. രഗോത്തമന് പ്രസിദ്ധീകരിച്ച ‘കോണ്സ്പിറസി ടു കില് രാജീവ്ഗാന്ധി- ഫ്രം സി.ബി.ഐ ഫയല്സ്’ എന്ന പുസ്തകത്തിലാണ് ആരോപണം.
മനുഷ്യബോംബായി രാജീവ് ഗാന്ധിയെ വധിച്ച ധനു അദ്ദേഹത്തിന്റെ വരവിന് ഏറെനേരം മുന്പ് വേദിയുടെ പരിസരത്ത് നില്ക്കുന്ന ദൃശ്യങ്ങളാണ് രഹസ്യാന്വേഷണ വിഭാഗം പൂഴ്ത്തിയത്. അന്നത്തെ രഹസ്യാന്വേഷണ വിഭാഗം മേധാവിയും ഇപ്പോഴത്തെ പശ്ചിമബംഗാള് ഗവര്ണറുമായ എം.കെ നാരായണന്റെ അറിവോടെയാണ് ദൃശ്യങ്ങള് പൂഴ്ത്തിയതെന്നാണ് പുസ്തകത്തിലെ ആരോപണം. വീഡിയോ ടേപ്പ് അപ്രത്യക്ഷമായതിനെക്കുറിച്ച് പ്രത്യേക അന്വേഷണ സംഘം തലവന് ഡി.ആര് കാര്ത്തികേയന് അന്വേഷണം നടത്തിയെങ്കിലും എം.കെ നാരായണന് ഇവിടെയും സുരക്ഷിതമായി രക്ഷപെടുകയായിരുന്നെന്നും പുസ്തകത്തില് പറയുന്നു.
1991 മെയ് 21 നാണ് ശ്രീപെരുമ്പതൂരില് രാജീവ് ഗാന്ധി കൊല്ലപ്പെടുന്നത്. സംഭവത്തിന്റെ പിറ്റേന്നു തന്നെ വീഡിയോഗ്രാഫറില് നിന്ന് ദൃശ്യങ്ങള് രഹസ്യാന്വേഷണ വിഭാഗം ശേഖരിച്ചെങ്കിലും ഒരിക്കലും ഇത് യഥാര്ഥ രൂപത്തില് അന്വേഷണസംഘത്തിന് നല്കിയിരുന്നില്ലെന്ന് പുസ്തകത്തില് പറയുന്നു.
രാജീവ്ഗാന്ധി എത്തുന്നതിന് രണ്ടര മണിക്കൂറിന് മുമ്പ് തന്നെ ശിവരശനും സംഘവും പരിസരത്തുണ്ടായിരുന്നു. രാജീവ്ഗാന്ധി എത്തിയതിന് ശേഷമാണ് തനു ആളുകള്ക്കിടയിലേക്ക് നുഴഞ്ഞുകയറിയതെന്ന തമിഴ്നാട് പോലീസിന്റെ കള്ളവാദം ബലപ്പിക്കാനാണ് വീഡിയോ ദൃശ്യം ഒളിപ്പിച്ചതെന്ന് പുസ്തകത്തില് പറയുന്നു.
