അമിതവും അകാരണവുമായ ഭയം, ഉത്കണ്ഠ, മതിഭ്രമങ്ങള് എന്നിവ രാഹു ജാതകത്തില് അനിഷ്ടഫലദാതാവായി വന്നാലുള്ള ഫലങ്ങളാണ്. ഇവര് പെട്ടെന്ന് വികാരഭരിതരാവുന്ന പ്രാകൃതക്കാരായിരിക്കും. ലഹരിവസ്തുക്കള്ക്ക് അടമപ്പെടാറുള്ള ഇവര് ഭ്രമാത്മകവും അസാധാരണവുമായ മനോവ്യാപാരങ്ങള്ക്ക് അടിമകളായിരിക്കും. താനാരെന്നോ തന്റെ കഴിവുകളെന്തെന്നോ തിരിച്ചറിയാന് കഴിവില്ലാത്ത ഇവര് അയഥാര്ത്ഥ സങ്കല്പങ്ങളുടെ മായാവലയത്തില്പെട്ട് യഥാര്ത്ഥജീവിതത്തില് പരാജിതരാകുന്നു. കുറച്ചുമാത്രം സുഹൃത്തുക്കള് ഉള്ള ഇവര് സമയത്തിന്റെ വിലയെക്കുറിച്ച്, ജീവിതത്തില് നല്ലകാലം പൊയ്പ്പോകുന്നതിനേക്കുറിച്ച് ബോധവാന്മാരായിരിക്കില്ല. നീചസ്ത്രീകളുമായി രഹസ്യബന്ധങ്ങള്, നീചജനങ്ങളുമായി സഹാവാസം, മല, കാട്, ഗുഹകള് തുടങ്ങിയവയില് ഏകാന്തവാസം നടത്താനുള്ള ആഗ്രഹം, കുനിഞ്ഞുനോക്കിനടത്തുന്ന സ്വഭാവം. അസത്യഭാഷണസ്വഭാവം, സംസാരത്തില് അന്യഭാഷകള് ഉപയോഗിക്കുന്ന സ്വഭാവം തുടങ്ങിയവ രാഹു അനിഷ്ടരായ ജാതകര്ക്ക് കാണാവുന്ന സവിശേഷതകളാണ്.
ഇവര്ക്ക് ജീവിതത്തില് പലപ്പോഴും വിഷബാധകള്ക്ക് വിധേയരാകേണ്ടിവന്നിരിക്കും. ദോഷകാഠിന്യമനുസരിച്ച് സര്പ്പവിഷം, എട്ടുകാലിവിഷം, കൈവിഷം, ഭക്ഷ്യവിഷം അങ്ങനെ എന്തുമാകാം. പൊതുവെ ത്വക്ക് രോഗങ്ങളും ഇവര്ക്കുണ്ടായിരിക്കും. പിശാചുപീഡ, സങ്കല്പ്പപീഡ, ബാലഗ്രഹപീഡ, ഭൂതപീഡ, പ്രേതബാധ ഇവയൊക്കെ രാഹു അനിഷ്ടരായവര്ക്ക് ഉണ്ടാകുമെന്നാണ് ജ്യോതിഷഗ്രന്ഥങ്ങള് സൂചിപ്പിക്കുന്നത്. അത്യധികം വിക്ഷോഭങ്ങള്ക്ക് സാധ്യതയുള്ളതും നിയന്ത്രണങ്ങള്ക്ക് കീഴ്പ്പെടാത്തതുമായ മാനസികവ്യാപാരങ്ങളായിരിക്കും ഇവര്ക്കുള്ളത്.
മൂന്ന്, പതിനൊന്ന് ഭാവങ്ങളൊഴിച്ച് മറ്റ് ഭാവങ്ങളില് രാഹുസ്ഥിതിയുള്ള ജാതകര്ക്ക് ആ രാഹു എന്തെങ്കിലും ദുരിതങ്ങള് നല്കിക്കൊണ്ടിരിക്കും. അവരൊക്കെ ദോഷപരിഹാരകര്മങ്ങള് അനുഷ്ഠിക്കുന്നത് നന്നായിരിക്കും. രാഹു എട്ട്, ആറ്, അഞ്ച്, ലഗ്നം, പന്ത്രണ്ട് തുടങ്ങിയ ഭാവങ്ങളില് നില്ക്കുക, ശനി, സൂര്യന്, ചൊവ്വ തുടങ്ങിവയുമായി ദൃഷ്ടിയോഗാദികള് വരിക എന്നിവയൊക്കെ നിശ്ചയമായും രാഹുദോഷശാന്തി അനുഷ്ഠിക്കേണ്ടതിന്റെ ആവശ്യകത വെളിപ്പെടുത്തുന്ന ഗ്രഹസ്ഥിതികളാണ്. അഷ്ടമത്തില് രാഹുസ്ഥിതിയുള്ളവര് ശാന്തികര്മ്മങ്ങള് അനുഷ്ഠിക്കുന്നതോടൊപ്പം സര്പ്പദംശനസാദ്ധ്യതയുള്ള പ്രദശങ്ങളില് സഞ്ചരിക്കുക, അസമയങ്ങളില് സഞ്ചരിക്കുക എന്നിവ കര്ശനമായി ഒഴിവാക്കണം. ഭരണി, പൂരം, പൂരാടം, രോഹിണി, അത്തം, തിരുവോമം, ആയില്യം, കേട്ട, രേവതി നക്ഷത്രക്കാരും രാഹുദോഷശാന്തി അനുഷ്ഠിക്കേണ്ടതാണ്. ചാരവശാല് ജന്മം, എട്ട്, ഒന്പത് തുടങ്ങിയ അനിഷ്ടഭാവങ്ങളില് രാഹു സഞ്ചരിക്കുന്ന കാലത്തും ദോഷപരിഹാരകര്മ്മങ്ങളില് അനുഷ്ഠിക്കേണ്ടതാണ്.
ഡോ. ബാലകൃഷ്ണവാര്യര്
