കോട്ടയം: വോട്ടുബാങ്കിനായി സാമുദായികമൈത്രി തകര്ക്കുന്ന നിലപാടാണ് ആഭ്യന്തരമന്ത്രി തിരുവഞ്ചൂര് രാധാകൃഷ്ണന് സ്വീകരിക്കുന്നതെന്ന് ബിജെപി ദേശീയ നിര്വാഹകസമിതിയംഗം പി.കെ.കൃഷ്ണദാസ് പറഞ്ഞു. തട്ടിപ്പു പാസ്റ്ററുടെ രാജ്യദ്രോഹ വിരുന്നാണ് നാഗമ്പടത്തെ മതപരിവര്ത്തനകേന്ദ്രത്തില് നടക്കുന്നതെന്നും അദ്ദേഹം പറഞ്ഞു. തങ്കുപാസ്റ്ററുടെ അനധികൃത ആരാധനാലയത്തിനു സംരക്ഷണം നല്കുന്ന സര്ക്കാര് നിലപാടില് പ്രതിഷേധിച്ചുകൊണ്ട് ആഭ്യന്തരമന്ത്രിയുടെ ഓഫീസിലേക്കു നടത്തിയ മാര്ച്ചില് പ്രസംഗിക്കുകയായിരുന്നു പി.കെ.കൃഷ്ണദാസ്.
ഹിന്ദു സാംസ്ക്കാരിക മൂല്യങ്ങള് തകര്ത്തുകൊണ്ട് ഹിന്ദുക്കളെ കൂട്ടമായി മതപരിവര്ത്തനം നടത്തുകയെന്ന ലക്ഷമിട്ടുപ്രവര്ത്തിക്കുന്ന അന്താരാഷ്ട്ര ഏജന്റാണ് തങ്കുപാസ്റ്റര്. നിയമവിരുദ്ധ പ്രവര്ത്തനങ്ങള് നടത്താത്ത ആളാണെങ്കില് തങ്കുവിന് എന്തിനാണ് രണ്ട് പാസ്പോര്ട്ടുകള് എന്ന് വ്യക്തമാക്കണം. കേരളത്തിലെ ഹൈന്ദവ സമൂഹത്തിന്റെ രോഷം തടയാന് തിരുവഞ്ചൂര് രാധാകൃഷ്ണന്റെ പോലീസ് സേനയ്ക്ക് കഴിയില്ലെന്നു മനസ്സിലാക്കണം. മതേതരത്വത്തേക്കുറിച്ച് പുരപ്പുറത്തിരുന്നു കൂവുന്ന മുഖ്യമന്ത്രി ഉമ്മന്ചാണ്ടി പ്രശ്നത്തില് ഇതുവരേയും ഇടപെടാത്തത് ദുരൂഹമാണ്. നഗരാസൂത്രണത്തിനായി നീക്കിവെച്ച സ്ഥലത്താണ് നാഗമ്പടത്ത് തങ്കുപാസ്റ്റര് വിവാദ ആരാധനാലയം ആരംഭിച്ചത്. നഗരസഭയുടെ അനുമതിയും ഇവര്ക്ക് ലഭിച്ചിരുന്നില്ല. ആരാധനാലയം നടത്തുന്നതിന് ജില്ലാ കളക്ടറുടെ അനുമതി വേണമെന്നിരിക്കേ അനുമതി വാങ്ങാതെയായിരുന്നു സ്വര്ഗ്ഗീയവിരുന്ന് പ്രവര്ത്തിച്ചുകൊണ്ടിരുന്നത്. അടുത്തകാലത്താണ് അനുമതി നല്കാന് ശ്രമം ഉണ്ടായതെങ്കിലും കോടതി ഇടപെട്ടതോടെ ജില്ലാ ഭരണകൂടത്തിന്റെ നീക്കം പാളുകയായിരുന്നു. ജില്ലാ കളക്ടര് മിനി ആന്റണി ഐഎഎസ്സിന്റെ ഭര്ത്താവിന് വിവാദ ആരാധനാലയവുമായി ബന്ധമുണ്ട്. ഇതുകൊണ്ടാണ് കോടതിവിധി അട്ടിമറിക്കാന് ജില്ലാ കളക്ടര് ഒത്തുകളിക്കുന്നത്. കോട്ടയം നഗരസഭയിലെ ബിജെപിയുടെ നാലു കൗണ്സിലര്മാര് ഒഴികെയുള്ളവര് തങ്കുപാസ്റ്ററിനായി രണ്ടുകയ്യുംപൊക്കി ഹല്ലേലൂയ പാടുകയാണ്. ഹിന്ദുക്കളെ മതംമാറ്റാനായി ജില്ലാ കളക്ടറും ജില്ലാപോലീസ് മേധാവിയും ആഭ്യന്തരമന്ത്രിക്കു കൂട്ടുനില്ക്കുന്നത് അവസാനിപ്പിക്കണമെന്നും പി.കെ.കൃഷ്ണദാസ് കൂട്ടിച്ചേര്ത്തു.
നിലയ്ക്കലില് ശബരിമല പൂങ്കാവനം കയ്യേറിയവര്ക്ക് ഭരണകൂടം എല്ലാവിധ ഒത്താശകള് നല്കിയെങ്കിലും ഹിന്ദുസമൂഹം സമരരംഗത്തിറങ്ങിയതോടെ നിലപാട് പിന്വലിക്കാന് തയ്യാറാകേണ്ടിവന്നത് ഓര്ക്കുന്നത് നന്നാകുമെന്ന് കേരളാ ക്ഷേത്രസംരക്ഷണ സമിതി സംസ്ഥാന ജനറല് സെക്രട്ടറി സ്വാമി അയ്യപ്പദാസ് പറഞ്ഞു. ഹിന്ദുസമൂഹത്തിനെതിരെ ഉയരുന്ന വെല്ലുവിളികളെ നേരിടാന് എന്തുവിലകൊടുക്കാനും ഹൈന്ദവപ്രസ്ഥാനങ്ങള് തയ്യാറാകുമെന്ന് വിഎച്ച്പി സംസ്ഥാന ജോയിന്റ് സെക്രട്ടറി വി.ആര് .രാജശേഖരന് പറഞ്ഞു. നാഗമ്പടത്തെ വിവാദ ആരാധനകേന്ദ്രം അടച്ചുപൂട്ടാന് സര്ക്കാര് ഉടനടി തയ്യാറാകണമെന്ന് സംസ്ഥാന ധര്മ്മജാഗരണ് പ്രമുഖ് വി.കെ.വിശ്വനാഥന് പറഞ്ഞു.
തിരുനക്കരയില്നിന്നും ആരംഭിച്ച മാര്ച്ച് ആഭ്യന്തരമന്ത്രിയുടെ കളക്ട്രേറ്റിനു സമീപത്തെ ഓഫീസിനടുത്തുവെച്ച് പോലീസ് തടഞ്ഞു. കോട്ടയം ജില്ലാ പോലീസ് ചീഫ് സി. രാജഗോപാലിന്റെ നേതൃത്വത്തില് അഞ്ഞൂറോളം പോലീസുകാരെയാണ് പ്രതിഷേധപ്രകടനത്തെ നേരിടാനായി വിന്യസിച്ചത്. ഭാരതീയവേലന് സൊസൈറ്റി സംസ്ഥാന പ്രസിഡന്റ് പി.ആര്.ശിവരാജന്, എ.കെ.പി.എം.എസ് സംസ്ഥാന വൈസ് പ്രസിഡന്റ് തമ്പി പട്ടശ്ശേരില്, സാംബവ മഹാസഭ സംസ്ഥാന വൈസ്പ്രസിഡന്റ് കെ.കെ.തങ്കപ്പന്, ബിജെപി നേതാക്കളായ കെ.ജി.രാജ്മോഹന്,ബി.രാധാകൃഷ്ണ മേനോന്,യുവമോര്ച്ച സംസ്ഥാന സെക്രട്ടറി എന്.ഹരി,പി.ജി.ബിജുകുമാര്,സി.എന്.സുഭാഷ്, എം.ആര്അനില്കുമാര്,എം.ബി.രാജഗോപാല്, റ്റി.എന്.ഹരികുമാര്,സുനില്കുമാര് കീരനാട്ട്, വിഎച്ച്പി നേതാക്കളായ കെ.എസ് ഓമനക്കുട്ടന്,ഹിന്ദുഐക്യവേദി നേതാക്കളായ ശ്രീകാന്ത് തിരുവഞ്ചൂര്,പൂഴിമേല് രണരാജന്,പ്രകാശ് കുമ്മനം, ആര്എസ്എസ് നേതാക്കളായ പി.പി.ഗോപി,ഉണ്ണികൃഷ്ണന്,മോഹനകണ്ണന്,ഡി.ശശികുമാര്,കെ.എന്.സജികുമാര്,ആര്.സാനു,ആര്.രാജീവ്,സി.ബി.സോമന്,വിനോദ്,കെ.എസ് ശശിധരന്,എബിവിപി സംസ്ഥാനസമിതിയംഗം ആര്.കൃഷ്ണരാജ് എന്നിവര് പ്രകടനത്തിന് നേതൃത്വം നല്കി.
