കോട്ടയം: ഗാന്ധിനഗര്‍ ഗവ. മെഡിക്കല്‍ കോളജില്‍ അസ്ഥിരോഗ വിഭാഗത്തില്‍ അപൂര്‍വ്വ ശസ്ത്രക്രിയയിലൂടെ 102 കാരന്റെ ഇടുപ്പെല്ല് ശസ്ത്രക്രിയ ചെയ്തു സുഖപ്പെടുത്തി. പെരുമ്പായിക്കാട്, മൂഴിക്കല്‍ രാമകൃഷ്ണപിള്ളയുടെ ഇടുപ്പെല്ലിന്റെ ശസ്ത്രക്രിയയാണ് വിജയകരമായി പൂര്‍ത്തിയാക്കിയത്.
വീഴ്ചയെത്തുടര്‍ന്നാണ് ഇടത് ഇടുപ്പെല്ല് ഒടിഞ്ഞത്. മെഡി. കോളജില്‍ പ്രവേശിപ്പിച്ച ഇദ്ദേഹത്തെ അസ്ഥിരോഗ വിഭാഗം
മേധാവി ഡോ. ടി.ജി. തോമസ് ജേക്കബ്ബ് ശസ്ത്രക്രിയക്കു നിര്‍ദേശിക്കുകയായിരുന്നു. ഇടുപ്പെല്ലിന്റെ ബോള്‍ മാറ്റിവയ്‌ക്കുന്ന ശസ്ത്രക്രിയയാണ് നടത്തിയത്. രാമകൃഷ്ണപിള്ളയെ കഴിഞ്ഞ ദിവസം ഡിസ്ചാര്‍ജ് ചെയ്തു.
വകുപ്പു മേധാവി ഡോ. ടി.ജി. തോമസ് ജേക്കബ്, ഡോ. അരുണ്‍, ഡോ. അശ്വിന്‍, ഡോ. വൈശാഖ്, അനസ്തീഷ്യ വിഭാഗത്തിലെ ഡോ. ലത ജനാര്‍ദ്ദനന്‍, ഡോ. സുജ, ഡോ. ഗായത്രി, നഴ്‌സ് ഷമീന എന്നിവരാണ് ശസ്ത്രക്രിയയില്‍ പങ്കാളികളായത്. കോട്ടയം മെഡിക്കല്‍ കോളജിലെ അസ്ഥിരോഗ വിഭാഗത്തില്‍ കഴിഞ്ഞ വര്‍ഷം 4726 മേജര്‍ ശസ്ത്രക്രീയകളാണ് വിജയകരമായി പൂര്‍ത്തീകരിച്ചത്.
പ്രതികരിക്കാൻ ഇവിടെ എഴുതുക: