ട്രെയിനിൽ തനിക്കൊപ്പമുണ്ടായിരുന്ന ആടിനും ടിക്കറ്റെടുത്ത് സ്ത്രീ; സത്യസന്ധതയെ അഭിനന്ദിച്ച് ടിടിഇ; ഇവർ രാജ്യത്തിനും അഭിമാനമെന്ന് കമന്റുകൾ

സഹജീവികളോടുള്ള പല വിധത്തിലുള്ള സ്‌നേഹപ്രകടനങ്ങളും വളരെ പെട്ടെന്നാണ് സമൂഹമാദ്ധ്യമങ്ങളിൽ വൈറലാകാറുള്ളത്. ഇപ്പോഴിതാ യാത്രയ്‌ക്കൊപ്പം കൂട്ടിയ ആടിനും ടിക്കറ്റെടുത്ത സ്ത്രീയുടെ വീഡിയോയാണ് സമൂഹമാദ്ധ്യമങ്ങളിൽ ശ്രദ്ധേയമാകുന്നത്. ടിക്കറ്റെടുക്കാതെ യാത്രചെയ്ത് മുങ്ങുന്ന യാത്രികർ സുലഭമായിടത്താണ് ഇവർ മാതൃകയായിരിക്കുന്നത്.

തനിക്കൊപ്പം യാത്ര ചെയ്യുന്ന ആടിന് വരെയും ടിക്കറ്റെടുത്താണ് ഇവർ ട്രെയിനിൽ കയറുന്നത്. കൂടാതെ ഇവർക്കൊപ്പം മറ്റൊരു വ്യക്തികൂടി യാത്ര ചെയ്യുന്നുണ്ട്. വീഡിയോയിൽ ടിടിഇ അടുത്ത് വന്ന് സംസാരിക്കുന്നതും ദൃശ്യമാണ്. ചോദ്യങ്ങൾക്കെല്ലാം ചിരിച്ചുകൊണ്ട് വളരെ ആത്മവിശ്വാസത്തോടെയാണ് ഇവരുടെ മറുപടി. തനിക്ക് മാത്രമല്ല തന്റെ ആടിനും ടിക്കറ്റെടുത്തിട്ടുണ്ടെന്ന ്ഇവർ പറയുന്നു. ഇവരുടെ സമീപത്തിരിക്കുന്നവരെല്ലാം ഇത് കേട്ട് ചിരിക്കുന്നതും വീഡിയോയിൽ ദൃശ്യമാണ്.

‘ഈ സ്ത്രീ തന്റെ ആടിനെയും ട്രെയിനിൽ കൊണ്ടുവന്നു. അതിനും അവർ ടിക്കറ്റ് എടുത്തിട്ടുണ്ട്. ടിക്കറ്റ് കളക്ടിങ് ഓഫീസർ ടിക്കറ്റിന് വേണ്ടി ചോദിക്കുമ്പോൾ തന്റെ സത്യസന്ധതയിൽ അവർക്കുള്ള അഭിമാനം നോക്കൂ’ എന്നാണ് വിഡിയോക്ക് ടിടിഇ കാപ്ഷൻ നൽകിയിരിക്കുന്നത്. അതേസമയം സത്യസന്ധതയെ പ്രകീർത്തിച്ച് നിരവധി കമന്റുകളാണ് വിഡിയോക്ക് താഴെ നിറയുന്നത്. ഇത്തരം വ്യക്തികൾ രാജ്യത്തിന്റെ അഭിമാനമാണെന്ന് ഒരു ഉപയോക്താവ് പറയുന്നു.