‘കല്യാണം കഴിക്കുക, സുഹൃത്തിന്റെ ഭാര്യയെ പ്രേമിക്കുക; കുട്ടിയെ പ്രേമിച്ച് കുട്ടിയുണ്ടാക്കുക’; ഇതൊക്കെയാണ് നാട്ടില്‍ നടക്കുന്നതെന്ന് സജി ചെറിയാന്‍

തിരുവനന്തപുരം: ദത്ത് വിവാദത്തില്‍ അനുപമ ചന്ദ്രനും അജിത്തിനുമെതിരെ   നിലപാടെടുത്ത്  മന്ത്രി സജി ചെറിയാന്‍.

സിപിഎമ്മിനെ പ്രതിരോധത്തിലാക്കിയ  പ്രശ്‌നത്തില്‍ പാര്‍ട്ടി അനുപമയക്കൊപ്പമെന്ന പരസ്യ നിലാപാട് എടുത്തപ്പോളാണ് മറിച്ച് പ്രതികരണവുമായി മന്ത്രി വന്നത്.  നേരത്തെ മുന്‍ മന്ത്രി ഇ പി ജയരാജനും അജിത്താണ് കുറ്റവാളി എന്ന  പ്രസ്താവന നടത്തിയിരുന്നു.

”കല്യാണം കഴിച്ചു രണ്ടും മൂന്നും കുട്ടികള്‍ ഉണ്ടാവുക, എന്നിട്ടു സുഹൃത്തിന്റെ ഭാര്യയെ പ്രേമിക്കുക, അതും പോരാഞ്ഞിട്ട് വളരെ ചെറുപ്പമായ ഒരു കുട്ടിയെ വീണ്ടും പ്രേമിക്കുക, ആ കുട്ടിക്കും ഒരു കുട്ടിയുണ്ടാക്കിക്കൊടുക്കുക, ചോദ്യം ചെയ്ത അച്ഛന്‍ ജയിലേക്കു പോവുക. ആ കുട്ടിക്ക് അതിന്റെ കുട്ടിയെ ലഭിക്കണമെന്നതിലൊന്നും ഞങ്ങള്‍ എതിരല്ല. പക്ഷേ, ആ അച്ഛന്റെയും അമ്മയുടെയും മനോനില മനസ്സിലാക്കണം.’ സാംക്കാരിക മന്ത്രി യായ സജി ചെറിയാന്‍ വെട്ടിത്തുറന്നു പറഞ്ഞു.

‘എനിക്കും മൂന്നു പെണ്‍കുട്ടികളായതു കൊണ്ടാണു പറയുന്നത്. പഠിപ്പിച്ചു വളര്‍ത്തി സ്ഥാനത്തെത്തിച്ചപ്പോള്‍ ആ കുട്ടി എങ്ങനെയാണ് വഴി തിരിഞ്ഞു പോയത്. ഊഷ്മളമായ അവളുടെ ജീവിതത്തെക്കുറിച്ച് എന്തെല്ലാം സ്വപ്നങ്ങളാവും മാതാപിതാക്കള്‍ കണ്ടിട്ടുണ്ടാവുക. പക്ഷേ, എങ്ങോട്ടാണു പോയത്. ഇരട്ടി പ്രായമുള്ള, വിവാഹിതനും രണ്ടു മൂന്നു കുട്ടികളുടെ പിതാവുമായ ഒരാളോടൊപ്പം. ഇതൊക്കെയാണ് നാട്ടില്‍ നടക്കുന്നത്.”  

സ്ത്രീ മുന്നേറ്റം ലക്ഷ്യമാക്കി സാംസ്‌കാരിക വകുപ്പ് നടപ്പാക്കുന്ന ‘സമം’ പദ്ധതിയുടെ ഭാഗമായി ആരംഭിച്ച സ്ത്രീകളുടെ നാടകക്കളരി കാര്യവട്ടം ക്യാംപസില്‍ ഉദ്ഘാടനം ചെയ്യുകയായിരുന്നു മന്ത്രി.