ആറ്റിങ്ങൽ: അഞ്ചുതെങ്ങിൽ നിന്നും മത്സ്യക്കച്ചവടത്തിന് പോയ അൽഫോൺസയോട് ആറ്റിങ്ങൾ നഗരസഭാ ജീവനക്കാർ കാണിച്ച അതിക്രമങ്ങളിൽ നടപടിയെടുക്കാത്ത സർക്കാർ നടപടിയിൽ പ്രതിഷേധം ശക്തമാക്കി മത്സ്യത്തൊഴിലാളികൾ. പ്രതിഷേധം ശക്തമാക്കുന്നതിന്റെ ഭാഗമായി അഞ്ചുതെങ്ങിൽ ആക്ഷൻ കൗൺസിൽ രൂപീകരിച്ചതായി ഫെറോനാ വികാരി ഫാദർ ജസ്റ്റിൻ ജുഡിൻ അറിയിച്ചു.
ജസ്റ്റിൻ ജുഡിൻ ചെയർമാനും ഫാദർ ലൂസിയാൻ തോമസ് കൺ‌വീനറും ആയി പതിനഞ്ചംഗ ആക്ഷൻ കൗൺസിലാണ് രൂപീകരിച്ചത്. ശക്തമായ പ്രതിഷേധവും സമരപരിപാടികളുമായി മുന്നോട്ട് പോകാൻ ആക്ഷൻ കൗൺസിൽ യോഗം തീരുമാനിച്ചു. ഇതിന്റെ ഭാഗമായി ഓഗസ്റ്റ് പതിനാലിന് ഇടവകതലത്തിൽ മത്സ്യകച്ചവട സ്ത്രീകളുടെ പ്രതിഷേധ യോഗം സംഘടിപ്പിക്കും. പതിനഞ്ചിന് ജീവിക്കാനുള്ള സ്വാതന്ത്ര്യം നിഷേധിച്ചതിനെതിരെ താഴം‌പള്ളി മുതൽ നെടുങ്ങണ്ട വരെ മനുഷ്യചങ്ങല തീർക്കും. പതിനാറിന് മത്സ്യബന്ധനവും വിപണനവും പൂർണമായി ഒഴിവാക്കി അഞ്ചുതെങ്ങ് ജംഗ്ഷനിൽ റോഡ് ഉപരോധിക്കും.
ആരോപണവിധേയനായ നഗരസഭാ ജീവനക്കാരനെ സസ്‌പെൻഡ് ചെയ്യുക, അൽഫോൺസയ്‌ക്കെതിരെ ചുമത്തിയിരിക്കുന്ന കേസുകൾ പിൻ‌വലിക്കുക, അൽഫോൺസയ്‌ക്കും മേരിക്കും ഉൾപ്പടെ മത്സ്യക്കച്ചവടത്തിനിടെ അതിക്രമം നേരിട്ട മുഴുവൻ കച്ചവടക്കാർക്കും നഷ്ടപരിഹാരം നൽകുക, മത്സ്യകച്ചവടത്തിന് ഭൗതിക സാഹചര്യങ്ങൾ അതാതു തദ്ദേശ സ്വയംഭരണ സ്ഥാപനങ്ങൾ ഉറപ്പുവരുത്തുക, കൊവിഡ് പശ്ചാത്തലത്തിൽ വഴിയോര കച്ചവടത്തിന് അനുമതി നൽകുക, മത്സ്യകച്ചവടക്കാർക്കു മേൽ പോലീസ് ചുമത്തിയിരിക്കുന്ന അനാവശ്യ ഫൈൻ പിൻ‌വലിക്കുക എന്നീ ആവശ്യങ്ങൾ നേടിയെടുക്കുന്നതിനായാണ് ആക്ഷൻ കൗൺസിൽ രൂപീകരിച്ചത്.
പ്രതികരിക്കാൻ ഇവിടെ എഴുതുക: