തിരുവനന്തപുരം: സിപിഎം വിട്ട് ബിജെപിയില്‍ ചേര്‍ന്നതില്‍ പ്രവര്‍ത്തകന് നേരെ ആക്രമണം. വര്‍ക്കല ചെമ്മരുതി പഞ്ചായത്തിലെ 47കാരനായ അനില്‍കുമറിനു നേരെയാണ് ആക്രമണമുണ്ടായത്. സിപിഎം പ്രവര്‍ത്തകനായിരുന്ന അനില്‍കുമാര്‍ പ്രവാസി ജീവിതം അവസാനിപ്പിച്ച് നാട്ടിലെത്തുകയും സിപിഎം വിട്ട് ബിജെപിയില്‍ ചേരുകയും ചെയ്തു.
ശനിയാഴ്ച ചാവടിമുക്കിന് സമീപത്ത് രാത്രി 12 മണിക്കാണ് സംഭവം. പാര്‍ട്ടി ഓഫീസില്‍ നിന്നും വീട്ടിലേക്ക് പോകും വഴി അനില്‍കുമാറിനു നേരെ ഒരു സംഘം ആളുകള്‍ എത്തുകയും വെട്ടി പരിക്കേല്‍പ്പിക്കുകയും ചെയ്യുകയായിരുന്നു. തലയ്‌ക്ക് പരിക്കേറ്റ അനില്‍കുമാറിനെ തിരുവനന്തപുരം മെഡിക്കല്‍ കോളേജില്‍ പ്രവേശിപ്പിച്ചു. അനിലിനൊപ്പം ഉണ്ടായിരുന്ന സുഹൃത്ത് ബൈജുവിന് നേരെയും ആക്രമണമുണ്ടായി.
ആക്രമണത്തിന് പിന്നില്‍ ഡിവൈഎഫ്ഐ നേതാവ് ഷാജി സുഗുണന്റ നേതൃത്വത്തിലുള്ള സംഘമാണെന്നും പ്രതികളെ ഉടന്‍ അറസ്റ്റ് ചെയ്യണമെന്നും ബിജെപി ആവശ്യപ്പെട്ടു. സംഭവത്തില്‍ പ്രതിഷേധിച്ച് ഇന്ന് വൈകിട്ട് അഞ്ചിന് പതിഷേധപ്രകടനം നടത്തുമെന്ന് ബിജെപി അറിയിച്ചിട്ടുണ്ട്.
പ്രതികരിക്കാൻ ഇവിടെ എഴുതുക: