തിരുവനന്തപുരം: നെയ്യാറ്റിന്‍‌കരയില്‍ സനല്‍ കൊല്ലപ്പെട്ട കേസ് ക്രൈംബ്രാഞ്ച് ഐജി എസ്.ശ്രീജിത്ത് നേരിട്ട് അന്വേഷിക്കും. ഐജി തലത്തിലുള്ള അന്വേഷണം സനലിന്റെ കുടുംബം ആവശ്യപ്പെട്ടിരുന്നു. സര്‍ക്കാരില്‍ വിശ്വാസം ഉണ്ടെന്ന് സനലിന്റെ ഭാര്യ വിജി അറിയിച്ചു. അതേസമയം ഹൈക്കോടതിയെ സമീപിക്കാനുള്ള തീരുമാനത്തില്‍ മാറ്റമില്ലെന്നും വിജി പറഞ്ഞു.
കേസ് സിബിഐ അല്ലെങ്കില്‍ കോടതിയുടെ മേല്‍നോട്ടത്തിലുള്ള അന്വേഷണ സംഘം അന്വേഷിക്കണമെന്നും ഇക്കാര്യം ആവശ്യപ്പെട്ട് ഹൈക്കോടതിയില്‍ നാളെ ഹര്‍ജി നല്‍കുമെന്നും സനലിന്റെ ഭാര്യ വിജി പറഞ്ഞിരുന്നു. ക്രൈംബ്രാഞ്ച് എസ്‌പി ആന്റണി വീട്ടിലെത്തിയെങ്കിലും മൊഴി രേഖപ്പെടുത്താതെ മടങ്ങുകയായിരുന്നു. സനലിന്റെ കൊലപാതകം അപകട മരണമാക്കാന്‍ ശ്രമിക്കുന്നുണ്ടെന്നും വിജി ആരോപിച്ചിട്ടുണ്ട്.
അതേസമയം സനലിനെ ഓടുന്ന വാഹനത്തിനു മുന്നിലേക്കെറിഞ്ഞു കൊന്ന ഡിവൈഎസ്‌പി ഹരികുമാറിനെ രക്ഷപ്പെടാന്‍ സഹായിച്ചയാള്‍ പിടിയിലായി. തൃപ്പരപ്പിലെ ടൂറിസ്റ്റ് ഹോം ഉടമ സതീഷ്‌കുമാറാണ് പിടിയിലായത്. സനലിനെ അപകടപ്പെടുത്തിയശേഷം ഹരികുമാര്‍ തൃപ്പരപ്പിലെ ലോഡ്ജിലെത്തി സതീഷ് കുമാറിനെ കണ്ടിരുന്നു.
ഡിവൈഎസ്‌പിയും സുഹൃത്ത് ബിനുവും സതീഷിനെ കണ്ടതായി ഇയാള്‍ ചോദ്യം ചെയ്യലില്‍ സമ്മതിച്ചിട്ടുണ്ട്. കൂടാതെ തൃപ്പരപ്പില്‍ എത്തിയപ്പോള്‍ ഹരികുമാറിന് രണ്ട് സിംകാര്‍ഡുകള്‍ നല്‍കിയതായും സതീഷ് മൊഴി നല്‍കി. പ്രതിക്ക് രക്ഷപ്പെടാന്‍ ചൊവ്വാഴ്ച വണ്ടി ഏര്‍പ്പാടാക്കി നല്‍കിയതും ഇയാളാണ്.
പ്രതികരിക്കാൻ ഇവിടെ എഴുതുക: