മട്ടാഞ്ചേരി: സാധാരണക്കാര്‍ വിവിധ ആവശ്യങ്ങള്‍ക്കായി ഉപയോഗിക്കുന്ന നൂറ്, അമ്പത് രൂപയുടെ മുദ്രപത്രങ്ങള്‍ ജില്ലയില്‍ കിട്ടാന്നില്ല. ഇതോടെ, കൂടിയ തുകയുടെ മുദ്രപത്രം വാങ്ങേണ്ട അവസ്ഥയിലാണ്. ആധാരങ്ങളുടെ പകര്‍പ്പ്, ജനന, മരണ സര്‍ട്ടിഫിക്കറ്റ്, വാടക കരാര്‍ എന്നിവ എഴുതുന്നതിന് ഈ തുകയുടെ മുദ്രപത്രം ഉപയോഗിക്കുന്നത്. കൂടാതെ, വന്യൂ സ്റ്റാമ്പും ലഭിക്കാത്ത സാഹചര്യമാണ്.
20, 10 രൂപയുടെ മുദ്രപത്രങ്ങള്‍ ലഭ്യമാണെങ്കിലും ഇത്തരം ആവശ്യങ്ങള്‍ക്ക് ഇത് സ്വീകരിക്കില്ലെന്നാണ് അധികൃതര്‍ പറയുന്നത്. പോക്ക് വരവിനും ബാങ്ക് വായ്പക്കും മറ്റുമാണ് ആധാരത്തിന്റെ പകര്‍പ്പ് രജിസ്റ്റര്‍ ഓഫീസില്‍ നിന്ന് എടുക്കുന്നത്. എന്നാല്‍ അമ്പത് രൂപ മുദ്രപത്രം ഇല്ലാത്തതിനാല്‍ അപേക്ഷ സ്വീകരിക്കാത്ത അവസ്ഥയാണ്. നൂറ് രൂപയുടെ മുദ്രപത്രവും ഇല്ലാതായാതോടെ അഞ്ഞൂറ് രൂപയുടെ മുദ്രപത്രമാണ് ഉപയോഗിക്കുന്നത്.
നൂറ് കണക്കിനാളുകളാണ് ആഴ്ചകളായി ആധാരത്തിന്റെ പകര്‍പ്പിനായി രജിസ്റ്റര്‍ ഓഫീസ് കയറിയിറങ്ങുന്നത്. ജനന, മരണ സര്‍ട്ടിഫിക്കറ്റിന് പോലും അഞ്ഞൂറ് രൂപ മുദ്രപത്രത്തെ ആശ്രയിക്കേണ്ട ഗതികേടിലാണ് ജനം. ഞാറക്കല്‍, മുളന്തുരുത്തി എന്നീ ട്രഷറികളില്‍ നേരത്തേയുണ്ടായിരുന്ന മുദ്രപത്രവും ഇപ്പോള്‍ ലഭിക്കാത്ത അവസ്ഥയാണ്.
കേന്ദ്രത്തില്‍ നിന്ന് ഈ വിലയുടെ മുദ്രപത്രം ലഭിക്കാത്തതാണ് കാരണമെന്നാണ് അതികൃതര്‍ പറയുന്നത്. സംസ്ഥാന സര്‍ക്കാര്‍ ഈയിനത്തില്‍ കേന്ദ്രത്തിന് നല്‍കേണ്ട വിഹിതം അടക്കാത്തതാണ് മുദ്രപത്രം ലഭിക്കാത്തതിന് കാരണം.
പ്രതികരിക്കാൻ ഇവിടെ എഴുതുക: