പുല്‍പ്പള്ളി : വനവാസി കോളനിയില്‍ വിതരണം ചെയ്ത വനിതാ ഓട്ടോറിക്ഷകള്‍ ഉപയോഗിക്കാത്തതിനാല്‍ നശിക്കുന്നു. ചീയമ്പം കോളനിയില്‍ വിതരണം ചെയ്ത ഓട്ടോകളാണ് മൂന്ന് വര്‍ഷത്തോളമായി ദ്രവിച്ചു കിടക്കുന്നത്.
വനവാസി വിഭാഗത്തില്‍ പെട്ട സ്ത്രീകള്‍ക്ക് സ്വയം തൊഴില്‍ നല്‍കുക എന്ന ലക്ഷ്യത്തോടെയാണ് വയനാട് ജില്ലയിലെ വിവിധ കോളനികളില്‍ സര്‍ക്കാര്‍ വനിതാ ഓട്ടോറിക്ഷകള്‍കള്‍ വിതരണം ചെയ്തത്. ലക്ഷകണക്കിന് രൂപ ചെലവഴിച്ച് നടപ്പിലാക്കിയ പദ്ധതിയിലൂടെ നിരവധി ഓട്ടോകളാണ് പ്രത്യേകം പരിശീലനം നല്‍കിയ സ്ത്രീകള്‍ക്ക് കൊടുത്തത്. ഇത്തരത്തില്‍ പുല്‍പ്പള്ളി ചീയമ്പം 73 കോളനിയില്‍ മൂന്ന് വര്‍ഷങ്ങള്‍ക്ക് മുന്‍പ് വിതരണം ചെയ്ത അഞ്ചോളം വനിതാ ഓട്ടോകളാണ് ഉപയോഗിക്കാന്‍ ആളില്ലാതെ നശിക്കുന്നത്.
മൂന്ന് വര്‍ഷം മുന്‍പ് കോളനിയില്‍ കൊണ്ട് വന്ന ശേഷം ഇതുവരെ ഈ ഓട്ടോകള്‍പുറത്തിറക്കിയിട്ടില്ല. അതുകൊണ്ട് തന്നെ മഴയും വെയിലും കൊണ്ട് ദ്രവിച്ച് നശിക്കുകയാണ് ഈ ഓട്ടോകള്‍. വനവാസി സ്ത്രീകളുടെ ഉന്നമനം ലക്ഷ്യം വെച്ചുള്ള ഈ പദ്ധതി കൊണ്ട് യാതൊരുവിധ ഉപയോഗവും ഉണ്ടായിട്ടില്ലെന്ന് കോളനിയിലുള്ളവര്‍ തന്നെ സാക്ഷ്യപ്പെടുത്തുന്നു.
ഓട്ടോറിക്ഷ ഓടിക്കാനാകാത്ത സ്ത്രീകള്‍ക്കുപകരം അവര്‍ നിര്‍ദേശിക്കുന്ന ആളെ ഡ്രൈവറായി നിയമിക്കാന്‍ അധികൃതര്‍ അനുവദിക്കാത്തതും ഓട്ടോകള്‍ നശിക്കാന്‍ പ്രധാന കാരണമായാ പറയുന്നു.
യാതൊരു വിധ പരിശോധനകളും ഇല്ലാതെ തലതിരിഞ്ഞ വികസന പ്രവര്‍ത്തനങ്ങളാണ് വനവാസി കോളനികളില്‍ നടത്തുന്നത് എന്നതിന്റെ ഉത്തമ ഉദാഹരണമാണ് നശിച്ചു കിടക്കുന്ന ഈ ഓട്ടോറികളെന്നും നാട്ടുകാര്‍ പറയുന്നു
പ്രതികരിക്കാൻ ഇവിടെ എഴുതുക: