ഇടുക്കി: മാരക രോഗങ്ങള്‍ക്കും മറ്റ് അസുഖങ്ങള്‍ക്കും ന്യായവില മരുന്ന് ലഭ്യമാക്കുന്ന ജില്ലയിലെ ആദ്യത്തെ കാരുണ്യ ഫാര്‍മസി നെടുങ്കണ്ടം താലൂക്കാശുപത്രിയില്‍ വനം- ഗതാഗത വകുപ്പ് മന്ത്രി തിരുവഞ്ചൂര്‍ രാധാകൃഷ്ണന്‍ ഉദ്ഘാടനം ചെയ്തു . മരുന്നുകളുടെ ഉയര്‍ന്ന വില മൂലം ബുദ്ധിമുട്ടനുഭവിക്കുന്ന രോഗികള്‍ക്ക് ആശ്വാസമേകുന്ന സംസ്ഥാനത്തെ 37-ാമത്തെ ഫാര്‍മസിയാണിതെന്ന് മന്ത്രി പറഞ്ഞു. ചടങ്ങിനോടനുബന്ധിച്ച് 74 ലക്ഷം രൂപ മുതല്‍ മുടക്കി നിര്‍മ്മിച്ച ഡോക്‌ടേഴ്‌സ് ക്വാര്‍ട്ടേഴ്‌സിന്റെ ഉദ്ഘാടനവും മന്ത്രി നിര്‍വഹിച്ചു. ആരോഗ്യ പരിരക്ഷയ്‌ക്കും ആശ്വാസത്തിനുമായി നിരവധി പദ്ധതികളാണ് സര്‍ക്കാരിന്റെ നേതൃത്വത്തില്‍ നടത്തി വരുന്നത്. കാരുണ്യ ബെനവലന്റ് പദ്ധതി, മുഖ്യമന്ത്രിയുടെ പ്രത്യേക ചികിത്സാ സഹായനിധി, മെഡിക്കല്‍ ഇന്‍ഷുറന്‍സ് പരിരക്ഷ തുടങ്ങിയ പദ്ധതികള്‍ സര്‍ക്കാരിന്റെ ജനോപകാരപ്രദമായ ആരോഗ്യ പരിരക്ഷ പരിപാലനത്തിനുള്ള ഉദാഹരണങ്ങളാണ്. മാതൃകാപരമായി ആരോഗ്യ മേഖലയിലെ സമഗ്ര വികസനത്തിന് ജനങ്ങളുടെയും വകുപ്പിന്റെയും സര്‍ക്കാരിന്റെയും പൂര്‍ണ്ണ പങ്കാളിത്തം ഉറപ്പാക്കിക്കൊണ്ടുള്ള പ്രവര്‍ത്തനങ്ങള്‍ നടപ്പിലാക്കുന്നതു വഴി ആരോഗ്യ മേഖലയില്‍ മുന്‍പിലെത്താന്‍ സാധിച്ചതായി മന്ത്രി പറഞ്ഞു. ചടങ്ങില്‍ നെടുങ്കണ്ടം ബ്ലോക്ക് പഞ്ചായത്ത് പ്രസിഡന്റ് കിങ്ങിണി രാജേന്ദ്രന്‍ അധ്യക്ഷത വഹിച്ചു.
ഗ്രാമപഞ്ചായത്ത് പ്രസിഡന്റ് ലീലാമ്മ ജോസഫ്, ഹോസ്പിറ്റല്‍ മാനേജ്‌മെന്റ് കമ്മറ്റിയംഗം പി. മുരളീധരന്‍, നെടുങ്കണ്ടം ബ്ലോക്ക് പഞ്ചായത്ത് വൈസ് പ്രസിഡന്റ് മാത്തുക്കുട്ടി, ജില്ലാ പഞ്ചായത്തംഗങ്ങളായ കൊച്ചുത്രേ്യസ്യാ പൗലോസ്, കെഎന്‍ മുരളി, നെടുങ്കണ്ടം ബ്ലോക്ക് പഞ്ചായത്തംഗങ്ങളായ മിനി സാബു, സോഫിയ ജോര്‍ജ്ജ്, ഡെപ്യൂട്ടി ഡിഎംഒ ഡോ. പ്രീതാ ഫ്രാന്‍സിസ് ആശുപത്രി സൂപ്രണ്ട് ഡോ. കീര്‍ത്തി സി.എം, ഡിസിസി പ്രസിഡന്റ് റോയ് കെ. പൗലോസ്, ഇബ്രാഹിംകുട്ടി കല്ലാര്‍ തുടങ്ങിയവര്‍ പങ്കെടുത്തു.
പ്രതികരിക്കാൻ ഇവിടെ എഴുതുക: