ചേര്‍ത്തല: ഭരണം പോയതോടെ ദല്‍ഹി കോണ്‍ഗ്രസ് ഓഫീസിലെ ജോലി നഷ്ടമായ മലയാളി തന്റെ ഭാര്യയും അഞ്ച് മക്കളുമായി ഒറ്റമുറി ലോഡ്ജില്‍ പട്ടിണിയില്‍. കഴിഞ്ഞ 12 വര്‍ഷമായി ദല്‍ഹി പ്രദേശ് കോണ്‍ഗ്രസ് കമ്മിറ്റിയുടെ ഓര്‍ഗനൈസിങ് സെക്രട്ടറിയായിരുന്ന കെ.എസ്. നായരും (48) ഭാര്യയും സ്‌കൂള്‍ വിദ്യാര്‍ത്ഥികളായ അഞ്ച് മക്കളുമാണ് ചേര്‍ത്തലയിലെ ലോഡ്ജില്‍ ദയനീയാവസ്ഥയില്‍ കഴിയുന്നത്. ഇവര്‍ നേരത്തെ കടുത്തുരുത്തിക്ക് സമീപം വാടയ്‌ക്ക് താമസിച്ച വീട്ടില്‍ കുടിശിഖയായതോടെ അവര്‍ കുട്ടികളുടെ യൂണിഫോമും പാഠപുസ്തങ്ങളും പിടിച്ചുവച്ചിരിക്കുന്നതിനാല്‍ കുട്ടികള്‍ക്ക് പരീക്ഷയും എഴുതാന്‍ കഴിയാത്ത സാഹചര്യത്തിലാണ്. കൂട്ട ആത്മഹത്യയ്‌ക്ക് തുനിഞ്ഞ ഇവരെ പരിചയക്കാരനും ഐഎന്‍ടിയുസി പ്രാദേശിക നേതാവുമായ കെ. ഗോപിനാഥന്‍ നായരാണ് ആഹാരസാധനങ്ങളും വസ്ത്രങ്ങളും വാങ്ങി നല്‍കുകയും ഇവര്‍ക്ക് ലോഡ്ജില്‍ മുറിയെടുത്തു നല്‍കുകയും ചെയ്തത്.
കടുത്തുരുത്തി സ്വദേശിയായ കെ.എസ്. നായര്‍ 30 വര്‍ഷത്തോളമായി ദല്‍ഹിയിലായിരുന്നു. ഇതിനിടെ ഇളയ കുട്ടിക്ക് ശ്വാസകോശ സംബന്ധമായ അസുഖമുണ്ടാവുകയും കുടുംബവുമായി നാട്ടിലെത്തി കുട്ടിക്ക് കോട്ടയം മെഡിക്കല്‍ കോളേജ് ആശുപത്രിയില്‍ ചികിത്സ തേടുകയുമായിരുന്നു. കുടുംബത്തെ നാട്ടില്‍ വാടക വീട്ടില്‍ താമസിപ്പിച്ച ശേഷം നായര്‍ ദല്‍ഹിക്ക് മടങ്ങി. നാട്ടിലെ ഇദ്ദേഹത്തിന്റെ വീടും സ്ഥലവും ബന്ധു വ്യാജരേഖയുണ്ടാക്കി കൈവശപ്പെടുത്തിയെന്ന് മനസിലാക്കി ജില്ലാ പോലീസ് മേധാവിക്ക് പരാതി നല്‍കിയതോടെ കുടുംബത്തിന് ഗുണ്ടകളുടെ ശല്യമായി.
ഇതിനിടെയാണ് ദല്‍ഹിയില്‍ കോണ്‍ഗ്രസിന് വന്‍തിരിച്ചടിയുണ്ടാവുകയും ജീവനക്കാരെ പിരിച്ചുവിടുകയും ചെയ്തത്. നാട്ടില്‍ തിരിച്ചെത്തിയ ഇദ്ദേഹത്തിന് വീടിന്റെ വാടക നല്‍കുവാന്‍ കഴിയാതെ വന്നതോടെ പുറത്താക്കുകയായിരുന്നു. തുടര്‍ന്നാണ് ജോലി തേടി കുട്ടികളോടൊപ്പം ചേര്‍ത്തലയിലെത്തിയത്. മലയാളം അറിയാത്ത ഭാര്യയും മക്കളുമായി ഏറെ അലഞ്ഞിട്ടും ജോലി ലഭിക്കാതെ വരുകയും രണ്ട് ദിവസത്തോളമായി പട്ടിണിയുമായതോടെയാണ് ജീവനൊടുക്കുവാന്‍ തീരുമാനിച്ചതെന്ന് ഇദ്ദേഹം പറയുന്നു.
ഇതിനിടെയാണ് ഗോപിനാഥന്‍ നായര്‍ കണ്ടുമുട്ടിയത്. കഴിഞ്ഞ തവണ ദല്‍ഹിയില്‍ നിയമസഭ തെരഞ്ഞെടുപ്പില്‍ മുഖ്യമന്ത്രി ഉമ്മന്‍ചാണ്ടിയുടെ പ്രസംഗം ഹിന്ദിയിലേക്ക് തര്‍ജമ ചെയ്തതതും കെ.എസ്. നായരായിരുന്നു. ദല്‍ഹി സ്വദേശിയായ കുംകുമ്മാണ് ഭാര്യ. ഒന്‍പതാം ക്ലാസ് വിദ്യാര്‍ത്ഥി ശശി ശേഖര്‍ സായി, എട്ടാം ക്ലാസ് വിദ്യാര്‍ത്ഥിനി അപര്‍ണ, ഏഴാം ക്ലാസ് വിദ്യാര്‍ത്ഥി ജയകൃഷ്ണന്‍, മൂന്നാം ക്ലാസ് വിദ്യാര്‍ത്ഥികളായ കാജല്‍, ആഷിഷ് എന്നിവരാണ് മക്കള്‍.
പ്രതികരിക്കാൻ ഇവിടെ എഴുതുക: