ആലുവ: അജ്ഞാതജീവികളുടെ ആക്രമണത്തെ തുടര്‍ന്ന് ആലുവയ്‌ക്കടുത്ത് വെളിയത്തുനാട് നിവാസികള്‍ ഭീതിയില്‍. കഴിഞ്ഞ ഏതാനും ദിവസങ്ങളായി വളര്‍ത്തുമൃഗങ്ങളെ ഈ അജ്ഞാതജീവി കൊന്നൊടുക്കുകയാണ്. ഇന്നലെ പുലര്‍ച്ചെ ഏഴ് ആടുകളെയാണ് ഇത്തരത്തില്‍ കൊന്നത്. ആടുകളുടെ കരള്‍ പറിച്ചെടുത്തശേഷം മാംസം ഉപേക്ഷിച്ചനിലയിലാണ് കാണപ്പെടുന്നത്.
മണിയെന്നയാളുടെ വീട്ടിലെ കൂട്ടില്‍ സൂക്ഷിച്ചിരുന്ന ഏഴ് ആടുകളെയാണ് ഈ ജീവി കൊന്നത്. മൂന്ന് ആടുകള്‍ പ്രസവിക്കാറായതായിരുന്നു. ഇതിനുമുമ്പും ഇത്തരത്തില്‍ മണിയുടെ രണ്ടാടുകളെ അജ്ഞാതജീവി കൊന്നിരുന്നു. നാട്ടുകാര്‍ ഉറക്കമൊഴിഞ്ഞ് കാത്തിരുന്നിട്ടും അജ്ഞാതജീവിയെ കണ്ടെത്താന്‍ കഴിഞ്ഞിട്ടില്ല.
പുറത്തേക്ക് ശബ്ദംകേള്‍ക്കാത്ത വിധത്തിലാണ് ആടുകളെ കൊലചെയ്യുന്നതെന്ന് നാട്ടുകാര്‍ പറയുന്നു. സമീപത്ത് ധാരാളമായി റബ്ബര്‍തോട്ടങ്ങളുണ്ട്. കുറുക്കനോ കാട്ടുപൂച്ചയോ നാട്ടിലിറങ്ങിയതാകാമെന്നാണ് പ്രാഥമിക പരിശോധന നടത്തിയ വെറ്ററിനറി ഡോക്ടര്‍മാരുടെ നിഗമനം. അജ്ഞാതജീവിയെ കണ്ടെത്തുന്നതിനുവേണ്ടി നാട്ടുകാര്‍ രാത്രി കാവലിരിക്കുവാനാണ് തീരുമാനം.
പ്രതികരിക്കാൻ ഇവിടെ എഴുതുക: