പൊന്കുന്നം: ഡെങ്കിപ്പനി പടര്ന്നുപിടിച്ച കാഞ്ഞിരപ്പള്ളി താലൂക്കിലെ തമ്പലക്കാട് ഗ്രാമത്തിന് വേദവ്യാസ വിദ്യാലയത്തിലെ കുട്ടികളുടെ ശുചീകരണപ്രവര്ത്തനവും ബോധവത്കരണവും ആശ്വാസമായി. കഴിഞ്ഞ ഒരു മാസമായി ഈ മേഖലയില് പനി പടര്ന്നുപിടിച്ചിരിക്കുകയും യുവതി മരിക്കുകയും നിരവധി പേര് ഗുരുതരാവസ്ഥയില് വിവിധ ആശുപത്രികളില് ചികിത്സയിലുമാണ്. ഈ സാഹചര്യത്തിലാണ് കുട്ടികള് പനി പ്രതിരോധ പ്രവര്ത്തനത്തില് പങ്കാളികളായത്. ഇന്നലെ രാവിലെ സ്കൂളില് വിദ്യാലയ സമിതി പ്രസിഡന്റ് കെ.വി.നാരായണന്റെ അദ്ധ്യക്ഷതയില് നടന്ന ബോധവത്കരണ ക്ലാസ് കാഞ്ഞിരപ്പള്ളി ഗ്രാമപഞ്ചായത്തംഗം മണിരാജു ഉദ്ഘാടനം ചെയ്തു. ജൂനിയര് ഹെല്ത്ത് ഇന്സ്പെക്ടര് ചീഫ്കിംഗ് ഡെങ്കിപ്പനിയെക്കുറിച്ചും പ്രതിരോധമാര്ഗ്ഗങ്ങളെക്കുറിച്ചും ക്ലാസ് നയിച്ചു. വാഴൂര് മേഖല സംയോജകന്, കെ.ജി.രാജേഷ്, വൈസ് പ്രിന്സിപ്പല് സുമാ ഗോപിനാഥ് തുടങ്ങിയവര് സംസാരിച്ചു.
തുടര്ന്ന് 9 ബാച്ചുകളിലായി കുട്ടികള് അറുനൂറോളം വീടുകളില് ബോധവത്കരണവും വീടുകളുടെ പരിസരശുചീകരണവും നടത്തി. ചിരട്ടകളിലും ചെറിയ പാത്രങ്ങളിലും ഗ്ലാസ് അടപ്പുകളിലും മറ്റുമുള്ള നൂറുകണക്കിന് കൂത്താടികളെ വീട്ടുകാര്ക്ക് കാണിച്ചുകൊടുക്കുകയും അവയെ നശിപ്പിക്കുകയും ചെയ്തു. റബ്ബര്മേഖലയായ ഇവിടെ നൂറുകണക്കിന് തോട്ടങ്ങളിലെ ആയിരക്കണക്കിന് ചിരട്ടകളും മറ്റും ശുചിയാക്കി. ശുചീകരണപ്രവര്ത്തനങ്ങള്ക്ക് അദ്ധ്യാപകരും ഹെല്ത്ത് ഇന്സ്പെക്ടര് മാരും ആശാപ്രവര്ത്തകരും നേതൃത്വം നല്കി. കുട്ടികളുടെ പ്രവര്ത്തനം കണ്ട് നിരവധി നാട്ടുകാരും ഇവരോടൊപ്പം ശുചീകരണപ്രവര്ത്തനങ്ങളില് പങ്കാളികളായി.
പ്രതികരിക്കാൻ ഇവിടെ എഴുതുക: