ചെന്നൈ: ഗണേശ ചതുർത്ഥിയോട് അനുബന്ധിച്ച് തമിഴ്‌നാട്ടിലെ തിരുനെൽവേലിയിലെ ബിരിയാണി കടയിൽ വെച്ച വിവാദ പരസ്യ ബോർഡിൽ കടയുടമ അറസ്റ്റിൽ. ഗണപതി ബിരിയാണി പാചകം ചെയ്യുന്ന രീതിയിലുള്ള ചിത്രമാണ് പരസ്യ ബോർഡിൽ നൽകിയിരുന്നത്.
തിരുനെൽവേലി നഗരത്തിലെ വി.എം. ചത്രം പാലത്തിന് സമീപമുള്ള ഒരു ബിരിയാണി കട ‘അറബിക് സ്റ്റൈൽ ചിക്കൻ 65 ബിരിയാണി’ ഓഫർ നൽകിക്കൊണ്ടുള്ള ഈ ബോർഡ് സ്ഥാപിച്ചത്. അറേബ്യൻ-സ്റ്റൈൽ ചിക്കൻ 65 ബിരിയാണി’ക്ക് 99 രൂപയുടെ പ്രത്യേക ഓഫർ പ്രഖ്യാപിച്ചുകൊണ്ടായിരുന്നു ബാനർ. ഈ ഓഫർ സെപ്റ്റംബർ 13, 14 തീയതികളിൽ മാത്രമേ ലഭ്യമാകൂ എന്നും വ്യക്തമാക്കിയിരുന്നു.
ഇക്കാര്യം അറിഞ്ഞതോടെ, ‘ഹിന്ദു മുന്നണി’ സംഘടനയുടെ ഭാരവാഹികളും പ്രവർത്തകരും കടയ്‌ക്ക് മുന്നിൽ പ്രതിഷേധിച്ചു. പരസ്യം മതവികാരം വ്രണപ്പെടുത്തുന്നതാണെന്നും ബാനർ ഉടൻ നീക്കം ചെയ്യണമെന്ന് പോലീസിനോട് ആവശ്യപ്പെട്ടു. മതവികാരങ്ങളെ മാനിക്കണമെന്ന് ആവശ്യപ്പെട്ടുകൊണ്ട് സോഷ്യൽ മീഡിയയിലും പ്രതിഷേധം കനത്തു.
മതവികാരം വ്രണപ്പെടുത്തുന്നു എന്ന പ്രതിഷേധത്തെത്തുടർന്ന് തിരുനെൽവേലി സിറ്റി പോലീസ് സ്ഥലത്തെത്തി ആ പരസ്യ ബാനർ നീക്കം ചെയ്യുകയായിരുന്നു.
