ശ്രീനഗര്‍: ജമ്മു കശ്മീരിലെ ഭീകരവിരുദ്ധ പ്രവര്‍ത്തനങ്ങള്‍ കൂടുതല്‍ ശക്തമാക്കുന്നതിന്റെ ഭാഗമായി നോര്‍ത്തേണ്‍ ആര്‍മി കമാന്‍ഡര്‍ ലെഫ്റ്റനന്റ് ജനറല്‍ പ്രതിക് ശര്‍മ്മ ദക്ഷിണ കശ്മീരിലെ സുരക്ഷാ സാഹചര്യം വിലയിരുത്തി. ഭീകരവിരുദ്ധ സുരക്ഷാ ഗ്രിഡും സേനയുടെ പ്രവര്‍ത്തന സജ്ജീകരണവും സംബന്ധിച്ച് മുതിര്‍ന്ന ഉദ്യോഗസ്ഥരില്‍ നിന്ന് അദ്ദേഹം വിശദീകരണം തേടി.
ദക്ഷിണ കശ്മീരിലെ നിലവിലെ സുരക്ഷാ സാഹചര്യം, ഭീകരവിരുദ്ധ പ്രവര്‍ത്തനങ്ങളുടെ തയാറെടുപ്പ്, രഹസ്യാന്വേഷണത്തെ അടിസ്ഥാനമാക്കിയുള്ള ഓപ്പറേഷനുകള്‍ എന്നിവയാണ് പ്രധാനമായും വിലയിരുത്തിയത്. ഉയര്‍ന്നുവരുന്ന ഏത് സുരക്ഷാ വെല്ലുവിളിയോടും അതിവേഗം പ്രതികരിക്കാന്‍ സേനാ സംവിധാനങ്ങള്‍ സജ്ജമായിരിക്കണമെന്ന് ലെഫ്റ്റനന്റ് ജനറല്‍ പ്രതിക് ശര്‍മ്മ നിര്‍ദേശിച്ചു.
അനുയോജ്യത, കൃത്യത, തുടര്‍ച്ചയായ ജാഗ്രത, വിവിധ സുരക്ഷാ ഏജന്‍സികള്‍ തമ്മിലുള്ള ഏകോപനം എന്നിവയാണ് വിജയകരമായ ഭീകരവിരുദ്ധ പ്രവര്‍ത്തനങ്ങളുടെ പ്രധാന ഘടകങ്ങളെന്ന് അദ്ദേഹം വ്യക്തമാക്കി. രഹസ്യാന്വേഷണ വിവരങ്ങളുടെ അടിസ്ഥാനത്തില്‍ കൃത്യമായ നടപടികള്‍ സ്വീകരിക്കുന്നതിനും അടിയന്തര സാഹചര്യങ്ങളില്‍ വേഗത്തില്‍ പ്രതികരിക്കുന്നതിനും പ്രത്യേക ഊന്നല്‍ നല്‍കി.
സൈനികരുമായി നടത്തിയ കൂടിക്കാഴ്ചയില്‍ ഭീകരവാദത്തില്‍ നിന്ന് മേഖലകളെ മുക്തമാക്കുന്നതിനും സമാധാനവും സ്ഥിരതയും ഉറപ്പാക്കുന്നതിനും സൈനികര്‍ കാണിക്കുന്ന ആത്മവിശ്വാസത്തെയും അര്‍പ്പണബോധത്തെയും അദ്ദേഹം അഭിനന്ദിച്ചു.
ജമ്മു കശ്മീരില്‍ സൈന്യം, പോലീസ്, സിആര്‍പിഎഫ് തുടങ്ങിയ സുരക്ഷാ വിഭാഗങ്ങള്‍ തമ്മിലുള്ള ഏകോപിത പ്രവര്‍ത്തനങ്ങളാണ് ഭീകരവിരുദ്ധ സുരക്ഷാ സംവിധാനത്തിന്റെ പ്രധാന ഭാഗം. പ്രത്യേകിച്ച് വനമേഖലകളും മലനിരകളും ഉള്‍പ്പെടെയുള്ള ദുഷ്‌കരമായ പ്രദേശങ്ങളില്‍ ഭീകരരുടെ സാന്നിധ്യം കണ്ടെത്തുന്നതിനും നീക്കങ്ങള്‍ തടയുന്നതിനുമാണ് സുരക്ഷാ ഏജന്‍സികള്‍ കൂടുതല്‍ ശ്രദ്ധ നല്‍കുന്നത്.
ഭീകരവിരുദ്ധ പോരാട്ടത്തില്‍ ജാഗ്രത കുറയ്‌ക്കില്ലെന്ന വ്യക്തമായ സന്ദേശമാണ് ദക്ഷിണ കശ്മീരിലെ സുരക്ഷാ ഗ്രിഡ് അവലോകനത്തിലൂടെ സൈന്യം നല്‍കുന്നത്.
