മാവേലിക്കര: ചലച്ചിത്രനടനും ആന്ധ്രാപ്രദേശ് ഉപമുഖ്യമന്ത്രിയുമായ കൊനിദേല പവന്‍ കല്യാണ്‍ ഇന്നലെ വൈകിട്ട് ചെട്ടികുളങ്ങര ഭഗവതിക്ഷേത്രത്തില്‍ ദര്‍ശനം നടത്തി. ആത്മീയ
ഗുരുവിന്റെ ഉപദേശ പ്രകാരമായിരുന്നു ദര്‍ശനം. കഴിഞ്ഞ മൂന്നാഴ്ചയായി തൃശൂര്‍ തളിക്കുളത്ത് സീതാറാം ആയൂര്‍വേദ സ്‌പെഷ്യാലിറ്റി ആശുപത്രിയില്‍ ചികിത്സയിലായിരുന്നു. ഇന്നലെ രാവിലെ ആശുപത്രിയില്‍ നിന്ന് ഡിസ്ചാര്‍ജ് ആയ ശേഷം ക്ഷേത്രദര്‍ശനത്തിന് എത്തുകയായിരുന്നു.
ആലപ്പുഴ മുന്‍ ജില്ലാ കളക്ടറും ഇപ്പോള്‍ പവന്‍ കല്യാണിന്റെ ജോ. സെക്രട്ടറിയുമായ വി.ആര്‍.കെ. കൃഷ്ണ തേജ ഐഎഎസ്, പ്രൈവറ്റ് സെക്രട്ടി ജി.ആര്‍. മധുസൂദനന്‍, പേഴ്‌സണല്‍ അസിസ്റ്റന്റ് എസ്. ബാലകൃഷ്ണ, സീതാറാം ആശുപത്രിയിലെ ഡോ. വിഘ്‌നേഷ് ദേവരാജ്, സുരക്ഷാ ഉദ്യോഗസ്ഥരും ഒപ്പമുണ്ടായിരുന്നു.
വൈകിട്ട് നാലേകാലോടെ ചെട്ടികുളങ്ങര ക്ഷേത്രത്തിന്റെ വടക്കേനടയില്‍ എത്തിയ പവന്‍ കല്യാണിനെ ക്ഷേത്ര അഡ്മിനിസ്‌ട്രേറ്റര്‍ ഓഫീസര്‍ പി.ആര്‍. മീര, ശ്രീദേവി വിലാസം
ഹിന്ദുമത കണ്‍വന്‍ഷന്‍ പ്രസിഡന്റ് ബി.ഹരികൃഷ്ണന്‍, സെക്രട്ടറി എം. മനോജ്കുമാര്‍, വൈസ് പ്രസിഡന്റ് വി. അനില്‍കുമാര്‍, ട്രഷറര്‍ പി. രാജേഷ് എന്നിവര്‍ ചേര്‍ന്ന് സ്വീകരിച്ചു. വടക്കേനടയിലുള്ള സ്വകാര്യ ലോഡ്ജില്‍ വിശ്രമിച്ച് ശരീരശുദ്ധി വരുത്തിയ ശേഷമാണ് ദര്‍ശനത്തിന് എത്തിയത്.
4.50തോടെ ക്ഷേത്രത്തിന്റെ വടക്കേ നടയില്‍ എത്തിയ അദ്ദേഹത്തിന് ക്ഷേത്രത്തിന്റെ ആചാര അനുഷ്ഠാനങ്ങളും ചരി
ത്രവും എഒ പി.ആര്‍. മീരയും കണ്‍വന്‍ഷന്‍ ഭാരവാഹികളും വിശദീകരിച്ചു നല്കി.
അഞ്ചിന് ക്ഷേത്രനട തുറന്ന ശേഷം അകത്തു കയറി ദര്‍ശനം നടത്തി. മേല്‍ശാന്തി എസ് രമേശില്‍ നിന്ന് പ്രസാദം സ്വീകരിച്ചു. ക്ഷേത്ര ഉപദേവതാ നടകളില്‍ എത്തിയ പവന്‍
കല്യാണ്‍ ഓരോ ഉപദേവതാ സങ്കല്‍പ്പത്തെയും ചോദിച്ചറിഞ്ഞു. ക്ഷേത്ര പ്രദക്ഷിണത്തിനുശേഷം യക്ഷിനടയ്‌ക്കു സമീപം അല്‍പ്പനേരം ധ്യാനിച്ച ശേഷമാണ് അദ്ദേഹം മടങ്ങിയത്.
ശ്രീദേവി വിലാസം ഹിന്ദുമത കണ്‍വന്‍ഷന്റെ കഞ്ഞിവഴിപാടിലേക്ക് സംഭാവന നല്കിയ പവന്‍ കല്യാണ്‍, ക്ഷേത്രത്തിന്റെ വികസനകാര്യങ്ങള്‍ക്ക് സഹായങ്ങള്‍ ചെയ്യാമെന്നും വീണ്ടും ദര്‍ശനം നടത്താന്‍ എത്തുമെന്നും അറിയിച്ചശേഷമാണ് മടങ്ങിയത്. ശ്രീദേവി വിലാസം ഹിന്ദുമത കണ്‍വന്‍ഷന്‍ ഭാരവാഹികളും ക്ഷേത്ര എഒ പി.ആര്‍. മീരയും ഉപഹാരം നല്കി.
ആന്ധ്രാപ്രദേശിലെ എന്‍ഡിഎ സര്‍ക്കാരിന്റെ ഘടകകക്ഷിയായ ജനസേനപാര്‍ട്ടിയുടെ സ്ഥാപകനും പ്രസിഡന്റുമാണ് പവന്‍ കല്യാണ്‍. മാവേലിക്കര സിഐ ദിജേഷ് എസ്, എസ്
എച്ച്ഒ സവിത എസ് എന്നിവരുടെ നേതൃത്വത്തില്‍ സുരക്ഷാക്രമീകരണങ്ങള്‍ ഒരുക്കി. തഹസീല്‍ദാര്‍ ശ്രീരാമകൃഷ്ണന്‍, തഹസീല്‍ ദാര്‍ (എല്‍ആര്‍) ബിനു, ഡെപ്യൂട്ടി തഹസീല്‍
ദാര്‍ സനില്‍കുമാര്‍ പി എന്നിവരും സന്നിഹിതരായിരുന്നു.
