ന്യൂയോർക്ക്: യുഎസ് ഓപ്പൺ വനിതാ സിംഗിൾസ് കിരീടം കസാഖ് താരം എലീന റിബാകിനയ്ക്ക്. ആവേശകരമായ ഫൈനൽ പോരാട്ടത്തിൽ നിലവിലെ ചാമ്പ്യനും ലോക ഒന്നാം നമ്പർ താരവുമായ ബെലാറസിന്റെ അരീന സബാലങ്കയെയാണ് എലീന റിബാകിന കീഴടക്കിയത്. ആർതർ ആഷെ സ്റ്റേഡിയത്തിൽ നടന്ന കലാശപ്പോരിൽ കസാഖ് താരം 6-4, 5-7, 6-2 എന്ന സ്കോറിനാണ് സബലങ്കയെ പരാജയപ്പെടുത്തിയത്.
ആദ്യ സെറ്റിൽ തുടക്കം മുതൽ ആധിപത്യം പുലർത്തിയ റിബാകിന 6-4ന് സെറ്റ് സ്വന്തമാക്കി. എന്നാൽ രണ്ടാം സെറ്റിൽ ശക്തമായി തിരിച്ചെത്തിയ സബലങ്ക 7-5ന് സെറ്റ് പിടിച്ചെടുത്തതോടെ മത്സരം നിർണായകമായ മൂന്നാം സെറ്റിലേക്ക് നീണ്ടു. മൂന്നാം സെറ്റിൽ തന്റെ ഏറ്റവും മികച്ച ഫോമിലേക്ക് തിരിച്ചെത്തിയ റിബാകിന സബലങ്കയ്ക്ക് തിരിച്ചുവരവിന് അവസരം നൽകാതെ മുന്നേറി. ശക്തമായ സർവീസുകളും കൃത്യതയാർന്ന ഗ്രൗണ്ട് സ്ട്രോക്കുകളുമായി കളം നിറഞ്ഞ താരം 6-2ന് സെറ്റും മത്സരവും കിരീടവും സ്വന്തമാക്കി.
കരിയറിലെ ആദ്യ യുഎസ് ഓപ്പൺ കിരീടമാണിഞ്ഞ റിബാകിന, സബലങ്കയെ മറികടന്ന് വനിതാ സിംഗിൾസ് റാങ്കിംഗിൽ ലോക ഒന്നാം നമ്പർ സ്ഥാനത്തേക്കും ഉയർന്നു. കരിയറിലെ മൂന്നാമത്തെ ഗ്രാൻഡ് സ്ലാം കിരീടം കൂടിയാണ് റിബാകിന സ്വന്തമാക്കിയത്. ഈ വർഷം ജനുവരിയിൽ നടന്ന ഓസ്ട്രേലിയൻ ഓപ്പണിന് ശേഷം റിബാകിന നേടുന്ന രണ്ടാമത്തെ ഗ്രാൻഡ്സ്ലാം കിരീടമാണിത്. കിരീടനേട്ടത്തോടെ ചരിത്രത്തിലെ ഏറ്റവും ഉയർന്ന തുകയായ 5.5 മില്യൺ യുഎസ് ഡോളറാണ് (ഏകദേശം 46 കോടിയിലധികം ഇന്ത്യൻ രൂപ) റിബാകിനയ്ക്ക് സമ്മാനമായി ലഭിക്കുന്നത്.
