മണ്ണറിഞ്ഞ് ജീവിക്കുന്ന നടനാണ് ആർ. മാധവൻ. വയലിലും ടെറസിലും കൃഷിപ്പണി ചെയ്യുന്ന മാധവന്റെ ചിത്രങ്ങൾ ഇതിനുമുൻപും സോഷ്യൽ മീഡിയയിൽ തരംഗമായിട്ടുണ്ട്. മുംബൈയിലെ അതിസമ്പന്ന മേഖലയായ ബാന്ദ്ര കുർള കോംപ്ലക്സിലെ 17.5 കോടി രൂപ മൂല്യമുള്ള, 4,182 ചതുരശ്ര അടി വിസ്തീർണമുള്ള ആഡംബര അപ്പാർട്മെന്റിലാണ് താരം താമസിക്കുന്നത്. തന്റെ അപ്പാർട്ട്മെന്റിൽ നിന്ന് കുടുംബത്തിന് ആവശ്യമായ 70 ശതമാനത്തോളം വിഷരഹിത പച്ചക്കറികളാണ് താരം സ്വന്തമായി ഉൽപാദിപ്പിക്കുന്നത്.
അപ്പാർട്മെന്റിന്റെ ടെറസിൽ ഹോഡ്രോപോണിക്സ് മാതൃകയിലാണ് താരത്തിന്റെ കൃഷി. ടെറസിൽ പ്ലാസ്റ്റിക് ഷീറ്റ് വിരിച്ച് അതിന് മുകളിൽ പച്ചമണ്ണും വളവും കൂട്ടിയിളക്കിയാണ് തടം ഒരുക്കിയിരിക്കുന്നത്. ഇതിലാണ് പച്ചക്കറി തൈകൾ നട്ടിരിക്കുന്നത്. കുക്കുമ്പർ, വെള്ളരി പോലുള്ള പച്ചക്കറികളാണ് കൂടുതലായും ഉള്ളത്. പടർന്നു കയറുന്ന ഇവയ്‌ക്ക് പന്തലായി കയറുകളും കെട്ടിയിട്ടിട്ടുണ്ട്.കുറഞ്ഞ വെള്ളം ഉപയോഗിച്ച് എങ്ങനെ കൃഷി ചെയ്യാം എന്നതിന് മികച്ച മാതൃക കൂടിയാണ് അദ്ദേഹത്തിന്റെ ഈ പച്ചക്കറിത്തോട്ടം.
വർഷങ്ങൾക്ക് മുൻപ് വഴുതനങ്ങ, വെണ്ടയ്‌ക്ക, തക്കാളി, ബ്രോക്കോളി, വെള്ളരിക്ക തുടങ്ങി പച്ചക്കറികൾ കൃഷി ചെയ്തിരുന്നു. എല്ലാവരും വീട്ടിലുള്ള സ്ഥലത്ത് പച്ചക്കറികൾ നടണമെന്നാണ് അന്ന് താരം പറഞ്ഞത്. 2017ൽ നൽകിയ ഒരു അഭിമുഖത്തിൽ, സിനിമയ്‌ക്ക് ശേഷമുള്ള സമയം കൃഷിക്കായി നീക്കിവയ്‌ക്കാൻ താൻ ആഗ്രഹിക്കുന്നുവെന്ന് താരം വ്യക്തമാക്കിയിരുന്നു. ആ സ്വപ്നമാണ് താരം ഇന്ന് തന്റെ അപ്പാർട്മെന്റിന്റെ ബാൽക്കണിയിൽ സാക്ഷാത്കരിച്ചിരിക്കുന്നത്.
സഹോദരൻ സുഭയോഗനോടൊപ്പം ചേർന്ന് തമിഴ്നാട്ടിലെ പഴനിയിൽ തെങ്ങ് കൃഷി ചെയ്തതും വാർത്തയായിരുന്നു. ഒന്നിനും കൊള്ളാതെ കിടന്ന ഭൂമിയാണ് താരത്തിന്റെയും സഹോദരന്റെയും കൂട്ടായ പരിശ്രമത്തിലൂടെ മികച്ചതാക്കി മാറ്റാൻ സാധിച്ചത്
