തിരുവനന്തപുരം: അര്‍ജന്റീന ടീമിനെയും വിഖ്യാത താരം ലയണല്‍ മെസിയെയും കേരളത്തില്‍ എത്തിക്കാനായി മുന്‍ കായികമന്ത്രി വി അബ്ദുറെഹ്മാന് വേണ്ടി കത്തിടപാടുകള്‍ നടത്തിയത് പ്രൈവറ്റ് സെക്രട്ടറിയെന്ന് കണ്ടെത്തല്‍.സെക്രട്ടേറിയറ്റ് മാനുവലിന് എതിരായാണ് കത്തിടപാട് നടന്നത്.
നയപരമായ കാര്യങ്ങളില്‍ പ്രൈവറ്റ് സെക്രട്ടറി കത്ത് നല്‍കാന്‍ പാടില്ല.ഇത് ലംഘിച്ചാണ് പ്രൈവറ്റ് സെക്രട്ടറി സത്യപാലന്‍ കത്ത് നല്‍കിയത്.സത്യപാലന്റെ കത്തുകളെല്ലാം ചട്ടവിരുദ്ധമെന്നാണ് കണ്ടെത്തല്‍.
അതിനിടെ, മെസിയെ എത്തിക്കാമെന്ന് പറഞ്ഞുളള തട്ടിപ്പ് അന്വേഷിക്കുന്നതിനായി പ്രത്യേക അന്വേഷണ സംഘം രൂപീകരിച്ചു. എഡിജിപി പി വിജയനാണ് അന്വേഷണ ചുമതല. രണ്ട് എസ്പിമാര്‍ സംഘത്തിലുണ്ട്. ക്രൈംബ്രാഞ്ച്, വിജിലന്‍സ്, ലോക്കല്‍ പൊലീസ് എന്നിവിടങ്ങളിലെ ഉദ്യോഗസ്ഥരെയും ഉള്‍പ്പെടുത്തും. തട്ടിപ്പില്‍ അഴിമതി നിരോധന നിയമപ്രകാരം കേസെടുക്കാം എന്ന് നിയമോപദേശം ലഭിച്ചിട്ടുണ്ട്.മുന്‍ കായിക മന്ത്രി അബ്ദുറഹ്മാന്റെ വിദേശയാത്രയും അന്വേഷിക്കും. സ്‌പോണ്‍സറെ തിരഞ്ഞെടുത്തതിലെ ക്രമക്കേട് വിശദമായി അന്വേഷിക്കും. സ്റ്റേഡിയം ചട്ടങ്ങള്‍ ലംഘിച്ചു കൈമാറിയതും പരിശോധിക്കും.
