കൊച്ചി: ആഗോള കപ്പല്‍ നിയന്ത്രണ- സഹായക സമുദ്ര സേവനദാതാക്കളായ സ്വിറ്റ്സറിന്റെ നാല് അത്യാധുനിക ബാറ്ററി- ഇലക്ട്രിക് ടഗ്ഗ് യാനങ്ങളുടെ നിര്‍മാണം കൊച്ചി കപ്പല്‍ നിര്‍മാണശാലയില്‍ ആരംഭിച്ചു. ഷിപ്പ്യാര്‍ഡിലെ ഔദ്യോഗിക സ്റ്റീല്‍ കട്ടിങ് ചടങ്ങോടെയാണ് നിര്‍മാണ പ്രവര്‍ത്തനങ്ങള്‍ക്ക് തുടക്കമായത്. ലോകത്ത് നിര്‍മിക്കപ്പെടുന്ന ഏറ്റവും മികച്ച പരിസ്ഥിതി സൗഹൃദ ടഗ്ഗ് ബോട്ടുകളില്‍ ഉള്‍പ്പെടുന്നവയാണ് ഈ യാനങ്ങള്‍.
നാല് വരുംതലമുറ ബാറ്ററി- ഇലക്ട്രിക് ‘ട്രാന്‍സ്വേഴ്‌സ് 2600ഇ’ ടഗ്ഗ് യാനങ്ങള്‍ നിര്‍മിക്കാന്‍ കഴിഞ്ഞ വര്‍ഷം കൊച്ചിന്‍ ഷിപ്പ്‌യാര്‍ഡും സ്വിറ്റ്സറും തമ്മില്‍ ഒപ്പുവെച്ച കരാറിന്റെ തുടര്‍ച്ചയായാണ് ചടങ്ങ്.
സ്വിറ്റ്സറിന്റെ പ്രത്യേക മാനദണ്ഡങ്ങള്‍ക്കനുസൃതമായി നിര്‍മിക്കുന്ന ഈ അത്യാധുനിക യാനങ്ങള്‍ ഭാരതത്തിന്റെ പരിസ്ഥിതി സൗഹൃദ ടഗ്ഗ് ബോട്ട് പരിവര്‍ത്തന പദ്ധതിയുടെ ലക്ഷ്യങ്ങള്‍ കൈവരിക്കാന്‍ പര്യാപ്തമാണ്.
കൊച്ചിന്‍ ഷിപ്പ്യാര്‍ഡ് സിഎംഡി ജോസ് വി.ജെ, സ്വിറ്റ്സര്‍ സിഒഒ കാസ്പര്‍ കാള്‍സെന്‍, സ്വിറ്റ്സര്‍ ഏഷ്യ, മിഡില്‍ ഈസ്റ്റ് ആന്‍ഡ് ആഫ്രിക്ക എംഡി ഡെനിസ് കിര്‍ദാര്‍ ട്രൂ എന്നിവരും ചടങ്ങില്‍ പങ്കെടുത്തു.
