തിരുവനന്തപുരം:പൊലീസ് സ്റ്റേഷനുകളുടെ ചുമതല എസ് പി മുതല് ഡിജിപി വരെയുള്ള ഉന്നത ഉദ്യോഗസ്ഥര്ക്ക് നല്കിയുളള സര്ക്കുലര് പൊലീസ് മേധാവി പിന്വലിച്ചു. സസ്പെന്ഷനിലുള്ള എഡിജിപി എം ആര് അജിത് കുമാറിനും ചുമതല നല്കിയത് വിവാദമായതോടെയാണ് സര്ക്കുലര് പിന്വലിച്ചത്.
മാതൃകാ സ്റ്റേഷനുകളാക്കാന് പൊലീസ് സ്റ്റേഷനുകള് ഉന്നത ഉദ്യോഗസ്ഥര് ദത്തെടുക്കണം എന്നാണ് സര്ക്കുലറില് നിര്ദ്ദേശിച്ചിരുന്നത്.ഡിജിപിമാരുടെ 2025ലെ സമ്മേളനത്തില് പ്രധാനമന്ത്രിയുടെ നിര്ദ്ദേശം കണക്കിലെടുത്താണ് 59 സ്റ്റേഷനുകളുടെ ചുമതല ഉന്നത ഉദ്യോഗസ്ഥര്ക്ക് പൊലീസ് മേധാവി നല്കിയത്. വികസിത് ഭാരതിനോടനുബന്ധിച്ചാണ് മാതൃകാസ്റ്റേഷനായി ഉയര്ത്തുകയെന്ന പ്രധാനമന്ത്രിയുടെ നിര്ദ്ദേശം. വര്ക്കല പൊലീസ് സ്റ്റേഷന് ചുമതലയാണ് എം ആര് അജിത് കുമാറിന് നല്കിയത്. കേന്ദ്ര ഡെപ്യൂട്ടേഷനിലുള്ള സുരേഷ് രാജ് പുരോഹിതിന് കിളിമാനൂര് സ്റ്റേഷന്റെ ചുമതല നല്കി.
കേരള കേഡറിലെ പത്ത് വര്ഷം സര്വീസുള്ള എസ്പി മുതല് ഡിജിപി വരെ എല്ലാ ഉദ്യോഗസ്ഥര്ക്കും സ്റ്റേഷന് ചുമതല നല്കി.അജിത് കുമാറിന് സസ്പെന്ഷന് കഴിയുമ്പോള് ചുമതല ഏറ്റെടുക്കാമല്ലോയെന്നായിരുന്നു അദ്ദേഹത്തെ ഉള്പ്പെടുത്തുമ്പോള് പൊലീസ് ആസ്ഥാനത്തെ ആലോചന. ഇത് വിവാദമായതോടെ ഉത്തരവ് പിന്വലിക്കാന് പൊലീസ് മേധാവി റവാഡ ചന്ദ്രശേഖര് തീരുമാനിച്ചു. പട്ടിക പുതുക്കി ഉത്തരവിറക്കും.
