ന്യൂദല്ഹി: ഒബിസി ക്രീമിലെയര് വിധി 2025ലെ സിവില് സര്വീസ് പരീക്ഷാഫലത്തില് ബാധകമാക്കണമോ എന്നതില് വ്യക്തത തേടി കേന്ദ്രസര്ക്കാര് സുപ്രീംകോടതിയെ സമീപിച്ചു. മാര്ച്ച് 11ലെ ഉത്തരവില് വ്യക്തത തേടിയാണ് കേന്ദ്രം കോടതിയെ സമീപിച്ചത്.
2025ലെ സിവില് സര്വീസ് ഫലം വന്ന് അഞ്ച് ദിവസങ്ങള്ക്ക് ശേഷമാണ് സുപ്രീംകോടതി വിധി വന്നത്. വിധി വരുന്നതിന് മുമ്പ് വന്ന ഫലമായതിനാല് 2025ലെ ബാച്ചിന് ഈ ഉത്തരവ് ബാധകമാക്കണോ എന്നാണ് കേന്ദ്രം സുപ്രീംകോടതിയോട് ചോദിച്ചിരിക്കുന്നത്. ഇതുസംബന്ധിച്ച് ഉചിതമായ ഉത്തരവ് നല്കണമെന്നും കേന്ദ്രം ആവശ്യപ്പെട്ടിട്ടുണ്ട്. 2025ലെ സിവില് സര്വീസ് ബാച്ചിന്റെ ഫൗണ്ടേഷന് കോഴ്സ് ഈ ആഴ്ച ആരംഭിക്കാനിരിക്കെയാണ് കേന്ദ്ര നടപടി.
മാതാപിതാക്കളുടെ വരുമാനത്തിന്റെ അടിസ്ഥാനത്തില് മാത്രം ഒബിസി വിഭാഗത്തിന്റെ ക്രീമിലെയര് പദവി നിര്ണയിക്കാന് കഴിയില്ലെന്നായിരുന്നു മാര്ച്ച് 11ന് സുപ്രീംകോടതി പുറപ്പടുവിച്ച വിധി. ഉദ്യോഗാര്ത്ഥികള് ഒബിസി ക്രീമിലെയറിലാണോ, നോണ്- ക്രീമിലെയറിലാണോയെന്ന് തീരുമാനിക്കാന് സാമൂഹികസ്ഥിതിയാകണം മാനദണ്ഡം. ഉദ്യോഗാര്ത്ഥികളുടെ മാതാപിതാക്കള് ജോലിചെയ്യുന്ന സ്ഥാപനങ്ങളില് വഹിക്കുന്ന തസ്തികയും പദവികളും ഉള്പ്പെടെ ക്രീമിലെയര് നിര്ണയത്തിന് പരിഗണിക്കണമെന്നും കോടതി നിര്ദേശിച്ചിരുന്നു. ക്രീമിലെയര് നിര്ണയം കേഡര് അലോട്ട്മെന്റില് ഉള്പ്പെടെ നിര്ണായക സ്വാധീനം ചെലുത്തുമെന്നും അതിനാല് ഇക്കാര്യത്തില് തീരുമാനം വൈകാതെ ഉണ്ടാകണമെന്നും കേന്ദ്രം ആവശ്യപ്പെട്ടിട്ടുണ്ട്.
