കണ്ണൂര്: എസ്എന്ഡിപി യോഗം ജനറല് സെക്രട്ടറി വെള്ളാപ്പള്ളി നടേശന് എ.എന് ഷംസീറിനെതിരെ ഇപ്പോഴെടുത്ത നിലപാട് നീചമെന്നും വര്ഗീയക്കലി തങ്ങളുടെ നേതാക്കളോട് വേണ്ടെന്നും സിപിഎം കണ്ണൂര് ജില്ലാ സെക്രട്ടറി കെ കെ രാഗേഷ്. ഷംസീറിനെക്കുറിച്ചുള്ള പരാമര്ശത്തിന് പിന്നില് വെള്ളാപ്പള്ളിയുടെ കടുത്ത മുസ്ലീം വിരോധമാണ്. സിപി എം നേതാക്കള്ക്കെതിരെ അടിസ്ഥാനരഹിതമായ ആരോപണങ്ങളുന്നയിക്കുകയും വൃത്തികെട്ട പ്രചാരവേല സംഘടിപ്പിക്കുകയും ചെയ്യുന്ന വെള്ളാപ്പള്ളി നടേശന്റെ നിലപാടുകള്ക്കെതിരെ ശക്തമായ ജനവികാരം ഉയരണം.
ഒരു സമുദായം മുഴുവന് താന് പറയുന്നതിനനുസരിച്ചാണ് ചിന്തിക്കുകയും പ്രവര്ത്തിക്കുകയും ചെയ്യുന്നത് എന്നാണ് ഇപ്പോഴും അദ്ദേഹം ധരിച്ചുവെച്ചിരിക്കുന്നത്. അതിനാല് തന്നെ ആരെയും എന്തും പറയുക എന്നത് അദ്ദേഹത്തിന്റെ വിചിത്രമായ ശീലമാണ്. അത് സമൂഹത്തില് വര്ഗീയചേരിതിരിവ് ഉണ്ടാക്കുന്ന തരത്തിലുള്ള എന്തെങ്കിലുമാണെങ്കില് ആ നാവിന് മൂര്ച്ച കൂടും. മുസ്ലീംവിരോധം കൊണ്ട് അന്ധമാകുമ്പോള് കൂടുതല് വിഷമിറങ്ങും. പലപ്പോഴും ഇരിക്കുന്ന സ്ഥാനത്തെ ബഹുമാനിക്കുന്നതു കൊണ്ടാവാം, അധികമാരും അതിനോട് ഏറ്റുമുട്ടി മിനക്കെടാറില്ല എന്നതാണ് വാസ്തവം.
എന്നാല് വന്ന് വന്ന് താനിരിക്കുന്ന സ്ഥാനമേതെന്ന ഓര്മ പോലും അദ്ദേഹത്തിന് ഇപ്പോള് ഇല്ലാതായിട്ടുണ്ടെന്ന് രാഗേഷ് കുറ്റപ്പെടുത്തി.
