തിരുവനന്തപുരം: സംസ്ഥാനത്തെ സര്ക്കാര് ആശുപത്രികളിലെ ഡോക്ടര്മാരുടെ വിവരങ്ങള് പൊതുജനങ്ങളുടെ അറിവിലേക്ക് വ്യക്തമായി പ്രദര്ശിപ്പിക്കാന് ആരോഗ്യ മന്ത്രി കെ മുരളീധരന്റെ നിര്ദ്ദേശം. ഡോക്ടര്മാരുടെ പേരും ഒ.പി ദിവസവും സമയവും കൃത്യമായി പ്രദര്ശിപ്പിക്കണം.സര്ക്കാര് ആരോഗ്യ സ്ഥാപനങ്ങളിലെ സേവനങ്ങള് കൂടുതല് സുതാര്യവും രോഗീസൗഹൃദവുമാക്കുന്നതിന്റെ ഭാഗമായാണ് ഇത്.
സംസ്ഥാനത്ത് താഴെത്തട്ടിലെ പല ആശുപത്രികളിലും ഒ.പി സമയത്ത് ഡോക്ടര്മാരില്ല. രോഗികള് മണിക്കൂറുകളോളം കാത്തുനില്ക്കേണ്ട സ്ഥിതിയാണെന്നും അടക്കം ആരോഗ്യ സ്ഥാപനങ്ങളുടെ പ്രവര്ത്തനവുമായി ബന്ധപ്പെട്ട് പൊതുജനങ്ങളില് നിന്ന് പരാതികള് ലഭിച്ച സാഹചര്യത്തിലാണ് മന്ത്രിയുടെ ഇടപെടല്.
പ്രാഥമികാരോഗ്യ കേന്ദ്രങ്ങള് മുതല് താലൂക്ക് ഹെഡ്ക്വാര്ട്ടേഴ്സ് ആശുപത്രികള് വരെയുള്ള എല്ലാ സര്ക്കാര് ആരോഗ്യ സ്ഥാപനങ്ങളിലും ഇത് അടിയന്തരമായി നടപ്പാക്കണമെന്ന് മന്ത്രി കെ.മുരളീധരന് ആരോഗ്യവകുപ്പ് പ്രിന്സിപ്പല് സെക്രട്ടറിയ്ക്ക് നിര്ദ്ദേശം നല്കി. ആരോഗ്യകേന്ദ്രത്തിലെ ഡോക്ടര്മാരുടെ അനുവദിച്ച തസ്തികകളുടെ എണ്ണം, നിലവിലുള്ള ഡോക്ടര് ഒഴിവുകളുടെ എണ്ണം, ഓരോ ഡോക്ടറുടെയും ഒ.പി സമയം, കണ്സള്ട്ടേഷന് സമയക്രമം എന്നീ വിവരങ്ങള് രോഗികള്ക്കും പൊതുജനങ്ങള്ക്കും കാണാവുന്ന രീതിയില് സ്ഥാപിക്കണം. ഇവയില് മാറ്റം വരുന്ന മുറയ്ക്ക് കൃത്യമായ ഇടവേളകളില് പുതുക്കണമെന്നും നിര്ദേശിച്ചിട്ടുണ്ട്.
