കണ്ണൂര്: ചൊക്ലിയില് ഹെല്ത്ത് ഇന്സ്പെക്ടര് ദീപാലേഖ കുഴഞ്ഞുവീണ് മരിച്ചത് പക്ഷാഘാതം കാരണമെന്ന് പ്രാഥമിക പോസ്റ്റുമോര്ട്ടം റിപ്പോര്ട്ട്. മാനസിക സംഘര്ഷമാകാം പക്ഷഘാതത്തിന് കാരണമെന്നും റിപ്പോര്ട്ടില് പറയുന്നുണ്ട്. മട്ടന്നൂരിലേക്ക് സ്ഥലംമാറ്റിയ ഉത്തരവ് ലഭിച്ചതിന് പിന്നാലെയാണ് ദീപാലേഖ കുഴഞ്ഞുവീണ് മരിച്ചത്.
അഞ്ചു മാസം മുമ്പാണ് ചൊക്ലിയില് എച്ച്ഐ ആയി ദീപാലേഖ ചുമതലയേറ്റത്.പുതിയ സര്ക്കാര് ഭരണത്തിലെത്തിയതോടെയാണ് സ്ഥലം മാറ്റിയത്. ഇടത് സംഘടന അംഗമായിരുന്നു ഇവര്.
രണ്ടുമാസം മുന്പ് അപകടത്തില്പ്പെട്ടതിനാല് ദീപാലേഖക്ക് നടക്കാന് ബുദ്ധിമുട്ടുണ്ടായിരുന്നു. ഇത് ഡിഎംഒയോട് പറഞ്ഞിരുന്നു.ലേഖയുടെ മരണത്തില് പ്രതിഷേധിച്ച് കണ്ണൂര് ജില്ലയിലെ മുഴുവന് സര്ക്കാര് ആശുപത്രികളിലും എന് ജി ഒ യൂണിയന് ഒരു മണിക്കൂര് ഡ്യൂട്ടി ബഹിഷ്കരിച്ചു. സ്ഥലംമാറ്റത്തില് കണ്ണൂര് ഡി എം ഒയ്ക്ക് എതിരെ ദീപാലേഖയുടെ കുടുംബം രംഗത്ത് വന്നിട്ടുണ്ട്.
