ലൂസെയ്ന്‍: ഏഷ്യന്‍ ഗെയിംസിനൊരുങ്ങുന്ന ഭാരതത്തിന്റെ ജാവലിന്‍ ത്രോ താരം നീരജ് ചോപ്രയ്‌ക്ക് മികച്ചൊരു റിഹേഴ്‌സല്‍ വേദിയായി ലൂസെയ്ന്‍ ഡയമണ്ട് ലീഗ്. 21ന് നടക്കുന്ന മത്സരത്തില്‍ നിലവിലെ ഒളിംപിക് സ്വര്‍ണ മെഡല്‍ ജേതാവ് പാകിസ്ഥാന്റെ അര്‍ഷാദ് നദീം, ലോക ചാമ്പ്യന്‍ കെഷ്‌റോണ്‍ വാല്‍ക്കോട്ട്, കോമണ്‍വെല്‍ത്ത് ഗെയിംസ് സ്വര്‍ണ ജേതാവ് ശ്രീലങ്കയുടെ റുമേഷ് പതിരഗെ എന്നിവരും മത്സരിക്കും. ഇവരെ കൂടാതെ മുന്‍ ലോക ചാമ്പ്യന്‍ ആന്‍ചേഴ്‌സണ്‍ പെറ്റേഴ്‌സും മുന്‍ ഒളിംപിക് സ്വര്‍ണ ജേതാവ് തോമസ് റൂളറും ലൂസെയ്‌നില്‍ മത്സരിക്കാനിറങ്ങും.
കടുത്ത പോരാട്ടമായി മാറുന്ന ഈ ഡയമണ്ട് ലീഗ് അടുത്ത മാസം നടക്കാനിരിക്കുന്ന ഏഷ്യന്‍ ഗെയിസിനുള്ള മികച്ച മുന്നൊരുക്കമാകും. അന്ന് നീരജിന് വലിയ വെല്ലുവിളിയായി മാറാനിടയുള്ള അര്‍ഷാദ് നദീമും റുമേഷ് പതിരഗെയും മത്സരിക്കുന്നത് മറ്റൊരു ഏഷ്യന്‍ പോരാട്ടത്തിന് കൂടിയായിരിക്കും വഴി തെളിയുക.
ഭാരതത്തിനായി ഒളിംപിക്‌സില്‍ ട്രാക്ക് ആന്‍ഡ് ഫീല്‍ഡില്‍ നിന്ന് ആദ്യ സ്വര്‍ണം നേടിയ നീരജ് പാരീസില്‍ വെള്ളി നേട്ടം കൊണ്ട് തൃപ്തിപ്പെടേണ്ടിവന്നിരുന്നു. നിലവിലെ സീസണില്‍ കോമണ്‍വെല്‍ത്ത് ഗെയിംസില്‍ റുമേഷിന് പിന്നില്‍ വെള്ളി നേടിയ 85.83 മീറ്റര്‍ ആണ് നീരജിന്റെ ഏറ്റവും മികച്ച പ്രകടനം. 89.75 മീറ്റര്‍ എറിഞ്ഞാണ് റുമേഷ് കോമണ്‍വെല്‍ത്തില്‍ സ്വര്‍ണം നേടിയത്.
സീസണില്‍ നീരജിന്റെ രണ്ടാം ഡയമണ്ട് ലീഗ് ആണിത്. ജൂണില്‍ നടന്ന ദോഹ ഡയമണ്ട് ലീഗില്‍ നീരജ് നാലാം സ്ഥാനത്തായിരുന്നു. അന്ന് 85.69 മീറ്റര്‍ ആണ് എറിഞ്ഞത്.
