സിന്‍സിനാറ്റി: ടെന്നീസ് ആരാധകര്‍ വിംബിവള്‍ഡണില്‍ കാത്തിരുന്ന ആ നിമിഷം സിന്‍സിനാറ്റി ഓപ്പണിലൂടെ പൂവണിഞ്ഞേക്കും. മുന്‍ ലോക ഒന്നാം നമ്പര്‍ താരങ്ങളായ സെറീന വില്ല്യംസും വീനസ് വില്ല്യംസും നാല് വര്‍ഷത്തെ ഇടവേളയ്‌ക്ക് ശേഷം വീണ്ടും വനിതാ ഡബിള്‍സ് കോര്‍ട്ടില്‍ ഒന്നിക്കുന്നു. ഈ മാസം നടക്കുന്ന സിന്‍സിനാറ്റി ഓപ്പണിലൂടെയാണ് ഇതിഹാസ സഹോദരിമാര്‍ വീണ്ടും ഒന്നിച്ചു മത്സരിക്കാനിറങ്ങുന്നത്.
ടൂര്‍ണമെന്റ് സംഘാടകര്‍ ഇരുവര്‍ക്കും ഡബിള്‍സില്‍ വൈല്‍ഡ് കാര്‍ഡ് എന്‍ട്രി അനുവദിച്ചു. 2022ലെ യു.എസ് ഓപ്പണിലായിരുന്നു ഇരുവരും അവസാനമായി ഒരുമിച്ച് വനിതാ ഡബിള്‍സില്‍ മത്സരിച്ചത്. അതിനുശേഷം ഇരുവരും ഒന്നിച്ച് കോര്‍ട്ടിലിറങ്ങിയിരുന്നില്ല. ഈ വര്‍ഷം ആദ്യം നടന്ന വിംബിള്‍ഡണില്‍ ഇരുവരും ഒന്നിച്ചു മത്സരിക്കാന്‍ തീരുമാനിച്ചിരുന്നെങ്കിലും അവസാന നിമിഷം സെറീനയ്‌ക്ക് പിന്മാറേണ്ടി വരികയായിരുന്നു. സിംഗിള്‍സ് മത്സരത്തിനിടെ മുട്ടിനേറ്റ പരിക്കാണ് സെറീനയ്‌ക്ക് തിരിച്ചടിയായത്. സഹോദരി വീനസിനൊപ്പം കളിക്കാനുള്ള അവസരം നഷ്ടമായതില്‍ ഏറെ നിരാശയുണ്ടെന്ന് സെറീന അന്ന് സോഷ്യല്‍ മീഡിയയിലൂടെ വ്യക്തമാക്കിയിരുന്നു. എന്നാല്‍, താമസിയാതെ തന്നെ താന്‍ കോര്‍ട്ടിലേക്ക് തിരിച്ചെത്തുമെന്ന സൂചനയും അന്ന് സെറീന നല്‍കിയിരുന്നു. ടെന്നീസ് ചരിത്രത്തിലെ തന്നെ ഏറ്റവും വിജയിച്ച ഡബിള്‍സ് ജോഡികളിലൊന്നാണ് വില്ല്യംസ് സഹോദരിമാര്‍. ഒന്നിച്ച് 14 ഗ്രാന്‍ഡ് സ്‌ലാം ഡബിള്‍സ് കിരീടങ്ങളാണ് ഇരുവരും സ്വന്തമാക്കിയിട്ടുള്ളത്. ഇതില്‍ 6 വിംബിള്‍ഡണ്‍ കിരീടങ്ങളും ഉള്‍പ്പെടുന്നു. ഇതുകൂടാതെ ഒളിമ്പിക്‌സില്‍ മൂന്ന് സ്വര്‍ണ്ണമെഡലുകളും ഇരുവരും ചേര്‍ന്ന് രാജ്യത്തിനായി നേടിയിട്ടുണ്ട്.
ഓഗസ്റ്റ് 11 മുതല്‍ 23 വരെയാണ് സിന്‍സിനാറ്റി ഓപ്പണ്‍ നടക്കുന്നത്. 46കാരിയായ വീനസ് വില്ല്യംസ് സിംഗിള്‍സിലും വൈല്‍ഡ് കാര്‍ഡിലൂടെ മത്സരിക്കുന്നുണ്ട്. എന്നാല്‍ 44കാരിയായ സെറീന ഡബിള്‍സില്‍ മാത്രമായിരിക്കും ഈ ടൂര്‍ണമെന്റില്‍ പങ്കാളിയാകുക. ഇതിഹാസ സഖ്യത്തിന്റെ തിരിച്ചുവരവ് കാണാന്‍ ആകാംക്ഷയോടെ കാത്തിരിക്കുകയാണ് ടെന്നീസ് ലോകം.
