ന്യൂദല്‍ഹി: കര്‍ത്തവ്യത്തിലും നിസ്വാര്‍ത്ഥതയിലും ഊന്നിയ പാതയാണ് ആര്‍എസ്എസ് പ്രാര്‍ത്ഥന മുന്നോട്ടുവയ്‌ക്കുന്നതെന്ന് സഹസര്‍കാര്യവാഹ് ഡോ. കൃഷ്ണഗോപാല്‍. ഭഗവദ്ഗീതയുടെ ദര്‍ശനമാണ് പ്രാര്‍ത്ഥന സംവദിക്കുന്നത്. ഡോ. മാര്‍ക്കണ്ഡേയ അഹൂജ രചിച്ച ‘സംഘ പ്രാര്‍ത്ഥന: ഗീത കേ പരിപ്രേക്ഷ്യ മേം’ എന്ന പുസ്തകം കേശവ് കുഞ്ജിലെ വിചാര്‍ വിനിമയ ന്യാസ് ഓഡിറ്റോറിയത്തില്‍ പ്രകാശനം ചെയ്ത് സംസാരിക്കുകയായിരുന്നു അദ്ദേഹം.
ഭാരതത്തിന്റെ ബൗദ്ധികവും സാംസ്‌കാരികവുമായ പാരമ്പര്യങ്ങളെ രൂപപ്പെടുത്തുന്നതില്‍ ഭഗവദ് ഗീത നിര്‍ണായക പങ്കാണ് വഹിച്ചത്. കടമയിലും നിസ്വാര്‍ത്ഥ പ്രവര്‍ത്തനത്തിലും വേരൂന്നിയ വ്യതിരിക്തമായ ദാര്‍ശനിക ദര്‍ശനമാണ് ഗീത ലോകത്തിന് സമ്മാനിച്ചത്. ഗീത മനുഷ്യനെ തന്റെ കടമയെക്കുറിച്ച് ബോധവാന്മാരാക്കുന്നു. ഭഗവാന്‍ കൃഷ്ണനും അര്‍ജുനനും തമ്മിലുള്ള സംഭാഷണവുമായി ഒരു സമാന്തര രേഖ വരച്ചുകൊണ്ടാണ് സംഘപ്രാര്‍ത്ഥനയെ ഈ പുസ്തകം അവതരിപ്പിക്കുന്നത്. അര്‍ജുനന്റെ മിഥ്യാധാരണകളെ ഇല്ലാതാക്കി, കര്‍മോത്സുകനാക്കാന്‍ ഭഗവാന്‍ പ്രേരിപ്പിക്കുന്നതുപോലെ, സ്വയംസേവകരെ വ്യക്തതയോടും ബോധ്യത്തോടും കൂടി ഉത്തരവാദിത്തങ്ങളിലേക്ക് നയിക്കാന്‍ ഈ പുസ്തകം ശ്രമിക്കുന്നുണ്ടെന്ന് കൃഷ്ണഗോപാല്‍ പറഞ്ഞു.
സംഘ പ്രാര്‍ത്ഥനയുടെ സാരാംശം ഭഗവദ്ഗീതയുമായി ആഴത്തില്‍ യോജിക്കുന്നുവെന്ന് പ്രശസ്ത ഗീതാ പണ്ഡിതന്‍ സ്വാമി ജ്ഞാനാനന്ദ് മഹാരാജ് പറഞ്ഞു. സുരുചി പ്രകാശന്റെ മാനേജിങ് ഡയറക്ടര്‍ രജനീഷ് ജിന്‍ഡല്‍, സിഇഒ അങ്കുര്‍ പഥക് എന്നിവരും പങ്കെടുത്തു.
