തിരുവനന്തപുരം: വീടുകള് പൂട്ടി യാത്രപോകുന്നവര്ക്ക് കള്ളന്മാരെ പേടിക്കാതെ വീട് സുരക്ഷിതമാക്കാനുള്ള പോല് ആപ്പിലെ ‘ലോക്ക്ഡ് ഹൗസ്’ സംവിധാനത്തിന് ആവശ്യക്കാര് ഏറുന്നു. വീടുകള് പൂട്ടിയിട്ട് യാത്ര ചെയ്യുന്നവര് അക്കാര്യം പോലീസിന്റെ മൊബൈല് ആപ്പ് വഴി അറിയിച്ചാല് വീട്ടിലും പരിസരത്തും പ്രത്യേക നിരീക്ഷണം ഏര്പ്പെടുത്തുന്നതാണ് സംവിധാനം. ഇതുവരെ 31,188 പേരാണ് ഈ സൗകര്യം വിനിയോഗിച്ചത്.
പോലീസിന്റെ ഔേദ്യാഗിക മൊബൈല് ആപ്പായ പോല്ആപ്പ് ഡൗണ്ലോഡ് ചെയ്ത ശേഷം അതിലെ ലോക്ക്ഡ് ഹൗസ് ഇന്ഫര്മേഷന് എന്ന വിഭാഗത്തിലാണ് ഇതിനായി അപേക്ഷിക്കേണ്ടത്. യാത്ര പുറപ്പെടുന്നതിന് 48 മണിക്കൂര് മുന്പ് വിവരം നല്കണം. യാത്രപോകുന്ന ദിവസങ്ങള്, വീടിന്റെ ഫോട്ടോ, സ്ഥിതിചെയ്യുന്ന സ്ഥലം, വിലാസം, ബന്ധുവിന്റെയോ അയല്വാസിയുടെയോ പേര്, ഫോണ് നമ്പര് എന്നിവ ആപ്പില് നല്കേണ്ടതുണ്ട്. ഏഴ് ദിവസം മുന്പുവരെ വിവരം പോലീസിനെ അറിയിക്കാവുന്നതാണ്. പരമാവധി 14 ദിവസം വരെ വീടും പരിസരവും പോലീസ് നിരീക്ഷണത്തിലായിരിക്കും. 14 ദിവസത്തിലധികം സേവനം ആവശ്യമായി വരികയാണെങ്കില് പുതിയ അപേക്ഷ സമര്പ്പിക്കണം.
സാധാരണക്കാര്ക്കും ലളിതമായി ഉപയോഗിക്കാന് പറ്റുന്ന രീതിയിലാണ് ആപ്പ് തയാറാക്കിയിരിക്കുന്നത്. പ്ലേസ്റ്റോറില് നിന്നും ആപ്പ് സ്റ്റോറില് നിന്നും പോല് ആപ്പ് ഡൗണ് ലോഡ് ചെയ്യാം. ഇതിനോടകം 17 ലക്ഷത്തോളം ആളുകള് ഈ ആപ്പ് ഡൗണ്ലോഡ് ചെയ്തിട്ടുണ്ട്.
