ശൂര്പ്പണഖയുടെ അപമാനത്തിന് പ്രതികാരം ചെയ്യാന് രാവണന് മാരീചന്റെ സഹായം തേടി. ആദ്യം മാരീചന് രാമന്റെ ശക്തിയെ ഓര്മ്മിപ്പിച്ച് രാവണനെ പിന്തിരിപ്പിക്കാന് ശ്രമിച്ചെങ്കിലും, ഒടുവില് അദ്ദേഹത്തിന്റെ നിര്ബന്ധത്തിന് വഴങ്ങി.
പഞ്ചവടിയിലെത്തിയ മാരീചന് പൂര്വസൗന്ദര്യമുള്ള ഒരു സ്വര്ണമാനിന്റെ രൂപം സ്വീകരിച്ച് രാമന്റെ ആശ്രമത്തിന് മുന്നിലൂടെ ഓടി. അതിന്റെ ഭംഗി കണ്ട സീതയ്ക്ക് അതിനെ സ്വന്തമാക്കണമെന്ന ആഗ്രഹമുണ്ടായി. സീതയുടെ അഭ്യര്ഥന മാനിച്ച് രാമന് മാനിനെ പിന്തുടര്ന്നു.
രാമന്റെ അമ്പേറ്റ മാരീചന് മരണമടയുന്ന നിമിഷത്തില്, ‘ഹാ സീതേ… ഹാ ലക്ഷ്മണാ…’ എന്ന് രാമന്റെ ശബ്ദത്തില് ഉറക്കെ വിളിച്ചു. ആ നിലവിളി കേട്ട് സീത ഭയപ്പെട്ടു. രാമനെ സഹായിക്കാന് ലക്ഷ്മണനോട് പോകാന് അവള് ആവശ്യപ്പെട്ടു. ആദ്യം വിസമ്മതിച്ചെങ്കിലും ഒടുവില് സീതയുടെ നിര്ബന്ധത്തിന് വഴങ്ങി ലക്ഷ്മണനും
ആശ്രമം വിട്ടു. അതായിരുന്നു രാവണന് കാത്തിരുന്ന നിമിഷം.ജീവിതത്തില് തിളങ്ങുന്നതെല്ലാം സത്യമാകണമെന്നില്ല. പലപ്പോഴും ആകര്ഷണത്തിന്റെ പുറംമോടിക്ക് പിന്നില് ഒരു വഞ്ചന ഒളിഞ്ഞിരിക്കും. വിവേകം നഷ്ടപ്പെടുന്ന ഒരു നിമിഷം, വലിയ പ്രത്യാഘാതങ്ങള്ക്ക് വഴിയൊരുക്കും.
രാമസ്പര്ശം: എല്ലാ തിളക്കവും പൊന്നിന്റേതല്ല; എല്ലാ ആകര്ഷണവും അനുഗ്രഹവുമല്ല.
ജന്മഭൂമി ഓണ്ലൈന്