മാഡ്രിഡ്: പുതിയ സീസണില് ലോകത്തെ ഏറ്റവും താരസമ്പന്നമായ ടീം റയല് മാഡ്രിഡാകുമെന്നുറപ്പായി. ലോകകപ്പില് മികച്ച കളിക്കാരനുള്ള ഗോള്ഡന് ബോള് സ്വന്തമാക്കിയ സ്പാനിഷ് താരവും മാഞ്ചസ്റ്റര് സിറ്റിയുടെ സ്പാനിഷ് മധ്യനിര താരവുമായ റോഡ്രിയെ ടീമിലെത്തിക്കാനുള്ള ഔദ്യോഗിക നീക്കങ്ങള് ആരംഭിച്ച് റയല് മാഡ്രിഡ്. മാഞ്ചസ്റ്റര് സിറ്റി മാനേജ്മെന്റുമായി റയല് മാഡ്രിഡ് ആദ്യഘട്ട ചര്ച്ചകള് ആരംഭിച്ചതായി പ്രമുഖ കായിക മാധ്യമപ്രവര്ത്തകന് ഫബ്രിസിയോ റൊമാനോ വെളിപ്പെടുത്തി. റയല് പ്രസിഡന്റ് ഫ്ലോറന്റീനോ പെരസ് പച്ചക്കൊടി കാണിച്ചതോടെയാണ് മാസങ്ങള് നീണ്ട കാത്തിരിപ്പിനൊടുവില് ട്രാന്സ്ഫര് നീക്കങ്ങള്ക്ക് വേഗം കൂടിയത്.
സ്പെയിനിനായുള്ള ലോകകപ്പ് വിജയം ഉള്പ്പെടെയുള്ള മികച്ച പ്രകടനങ്ങള്ക്ക് പിന്നാലെ റോഡ്രിയെ ക്ലബ്ബിലെത്തിക്കുക എന്നത് റയല് മാഡ്രിഡിന്റെ ഏറ്റവും പ്രധാനപ്പെട്ട ലക്ഷ്യമായി മാറിയിരിക്കുകയാണ്. 50 ദശലക്ഷം യൂറോയിലധികം (ഏകദേശം 450 കോടിയിലധികം രൂപ) തുക വാഗ്ദാനം ചെയ്ത് കരാര് ഉറപ്പിക്കാനാണ് റയല് മാഡ്രിഡ് തയ്യാറെടുക്കുന്നത്. ഇത് മാഞ്ചസ്റ്റര് സിറ്റി സമ്മതിച്ചതായാണ് വിവരം.
മാഞ്ചസ്റ്റര് സിറ്റിയില് 2027 വരെ കരാറുണ്ടെങ്കിലും, സ്വന്തം രാജ്യമായ സ്പെയിനിലേക്ക് തിരിച്ചെത്താനുള്ള റോഡ്രിയുടെ താല്പര്യം ട്രാന്സ്ഫറില് നിര്ണ്ണായകമായേക്കും.
