ധാക്ക: ബംഗ്ലാദേശിലെ മുന് പ്രസിഡന്റ് മൊഹമ്മദ് ഷഹാബുദ്ദീനെതിരെ രാജ്യാന്തര കുറ്റകൃത്യ ട്രൈബ്യൂണലില് മനുഷ്യത്വവിരുദ്ധ കുറ്റങ്ങള് ചുമത്തി പരാതി നല്കി. 2024ലെ ജനകീയ പ്രക്ഷോഭവുമായി ബന്ധപ്പെട്ട നടപടികളില് പങ്കുണ്ടെന്ന ആരോപണത്തെ തുടര്ന്നാണ് പരാതി സമര്പ്പിച്ചിരിക്കുന്നത്. ഷഹാബുദ്ദീന് അടുത്തിടെ പ്രസിഡന്റ് സ്ഥാനത്ത് നിന്ന് രാജിവെച്ചതിന് പിന്നാലെയാണ് പുതിയ നിയമനടപടികള് ആരംഭിച്ചിരിക്കുന്നത്.
ഇതിനൊപ്പം, മുന് പ്രസിഡന്റിനെതിരെ അഴിമതി അന്വേഷണം നടത്താനും ബംഗ്ലാദേശ് സര്ക്കാര് ഉത്തരവിട്ടിട്ടുണ്ട്. അധികാരത്തിലിരിക്കെ സാമ്പത്തിക ക്രമക്കേടുകള് നടന്നിട്ടുണ്ടോയെന്ന് അന്വേഷിക്കാനാണ് തീരുമാനം. നിയമത്തിന് മുന്നില് എല്ലാവരും തുല്യരാണെന്ന നിലപാടാണ് സര്ക്കാര് സ്വീകരിക്കുന്നതെന്ന് നിയമമന്ത്രി അറിയിച്ചു.
ഷെയ്ഖ് ഹസീനയുടെ അടുത്ത അനുയായികളില് ഒരാളായിരുന്ന ഷഹാബുദ്ദീനെതിരെ തുടര്ച്ചയായി നിയമനടപടികള് ആരംഭിച്ചതോടെ ബംഗ്ലാദേശിലെ രാഷ്ട്രീയ സാഹചര്യം കൂടുതല് ചൂടുപിടിച്ചിരിക്കുകയാണ്. രാജ്യത്തെ സമീപകാല രാഷ്ട്രീയ മാറ്റങ്ങളുടെ പശ്ചാത്തലത്തില് ഈ കേസുകള്ക്ക് വലിയ പ്രാധാന്യമാണുള്ളത്.
