തിരുവനന്തപുരം: നഗരത്തില്‍ ലോണ്‍ ആപ്പ് വഴി കോടികളുടെ തട്ടിപ്പ് നടത്തിവന്ന സംഘം പിടിയിലായി.വിദേശികളില്‍ നിന്ന് അടക്കം കോടികള്‍ തട്ടിയെടുത്ത സംഘത്തിലെ 18 ഉത്തരേന്ത്യക്കാരാണ് പിടിയിലായത്. ഡാന്‍സാഫ് സംഘമാണ് ഇവരെ കസ്റ്റഡിയിലെടുത്തത്. ഇവരില്‍ നിന്ന് 50 കമ്പ്യൂട്ടറുകളും പൊലീസ് പിടിച്ചെടുത്തു.
വിദേശികളെ ലക്ഷ്യമിട്ടാണ് ശ്രീകാര്യം കേന്ദ്രമാക്കി കമ്പനി പ്രവര്‍ത്തിച്ചു വന്നത്.ഇടപാടുകാര്‍ കൂടുതലും അമേരിക്കക്കാരാണ്.
ഓപ്പറേഷന്‍ തൂഫാനുമായി ബന്ധപ്പെട്ടുളള പരിശോധനയിലാണ് തട്ടിപ്പ് സംഘം വലയിലായത്. ഇതരസംസ്ഥാന തൊഴിലാളികള്‍ ശ്രീകാര്യം കേന്ദ്രീകരിച്ച് ലഹരിക്കച്ചവടം നടത്തുന്നുവെന്ന രഹസ്യ വിവരം കിട്ടിയത് മുതല്‍ പൊലീസിന്റെ നിരീക്ഷണത്തിലായിരുന്നു ഇവിടം.തട്ടിപ്പിനെ കുറിച്ചുള്ള വിവരം മനസിലായതോടെ തിങ്കളാഴ്ച പൊലീസ് റെയ്ഡ് നടത്തി. ജീവനക്കാരില്‍ ഒരാള്‍ വിമാനത്താവളം വഴി രക്ഷപ്പെടാന്‍ ശ്രമിച്ചെങ്കിലും പൊലീസ് ഇയാളെയും പിടികൂടി.
