മലപ്പുറം: ചോക്കാട് കുടുംബാരോഗ്യ കേന്ദ്രത്തിലെ ജനറേറ്റർ തകരാർ ആയതിനെ തുടർന്ന് ആശുപത്രി ജീവനക്കാരും രോഗികളും ദുരിതത്തിൽ. രോഗികളെ പരിശോധിക്കുന്നതും, കുട്ടികൾക്കുള്ള കുത്തിവെപ്പ് എടുക്കുന്നതും മൊബൈൽ വെളിച്ചത്തിൽ. അറ്റകുറ്റപ്പണിക്കായി കെഎസ്ഇബി അധികൃതർ ലൈൻ ഓഫ് ചെയ്തതോടെ വൈദ്യുതി നിലച്ചതിനാലാണിത്‌.
വൈദ്യുതി പോകുന്നതോടെ ഒരാഴ്ചയായി മൊബൈൽ ഫോൺ വെളിച്ചത്തിലാണ് ഡോക്ടർമാർ രോഗികളെ ചികിത്സിക്കുന്നത്. ആശുപത്രിയിലെ ജനറേറ്ററും പ്രവർത്തനരഹിതമാണ്‌. ഇതോടെ ഇ ഹെൽത്ത് സംവിധാനം താറുമാറായി. ഒപി പ്രവർത്തിക്കുന്നതും മൊബൈൽ ഫോൺ വെളിച്ചത്തിലാണ്. ഇ ഹെൽത്ത് സംവിധാനത്തിൽ ഡോക്ടർമാരുടെ ലഭ്യത, ഒപി ടിക്കറ്റ്, ഡോക്ടറുടെ കുറിപ്പടി, ലാബ് റിസൾട്ട്‌, മരുന്ന് വിതരണം എല്ലാം കംപ്യൂട്ടർ വിവരങ്ങളുടെ അടിസ്ഥാനത്തിലാണ്‌. ഇതെല്ലാം സ്തംഭിച്ചു.
ബുധനാഴ്ച ഒപി ടിക്കറ്റ് എഴുതിനൽകുകയായിരുന്നു. കുത്തിവയ്‌പ്‌ എടുക്കുന്നതുൾപ്പെടെ മൊബൈൽ ഫോൺ വെളിച്ചത്തിലാണ്. ബദൽ സംവിധാനമില്ലാത്ത കാര്യം പഞ്ചായത്ത് അധികൃതർ വൈദ്യുതി വകുപ്പിനെ അറിയിച്ചില്ലെന്നും ആക്ഷേപമുണ്ട്‌. ജനറേറ്റർ തകരാർ പരിഹരിച്ച്‌ പ്രതിസന്ധി പരിഹരിക്കണമെന്നാണ്‌ നാട്ടുകാരുടെ ആവശ്യം.
