കൊച്ചി: തോപ്പുംപടിയിലെ സൂപ്പര്‍മാര്‍ക്കറ്റില്‍ നിന്ന് 62 ലക്ഷത്തോളം രൂപ കവര്‍ന്ന കേസില്‍ പ്രതികള്‍ പിടിയില്‍. മട്ടാഞ്ചേരി നസ്രത്ത് ഹോളിക്രോസ് നഗര്‍ സ്വദേശിനി സനമോള്‍ എം എ (31), മുന്‍ ജീവനക്കാരനായ പള്ളുരുത്തി സ്വദേശി രഞ്ജു സാജ് എബ്രഹാം (23) എന്നിവരെയാണ് പിടികൂടിയത്.
തോപ്പുംപടിയിലെ പിക് എന്‍ സേവ് സൂപ്പര്‍മാര്‍ക്കറ്റില്‍ നിന്ന് 2022 മേയ് മുതല്‍ 2025 ഒക്ടോബര്‍ വരെയുള്ള കാലയളവിലാണ് തട്ടിപ്പ് നടത്തിയത്.ബില്ലിംഗ് വിഭാഗത്തില്‍ ജോലി ചെയ്തിരുന്ന സനമോള്‍ തട്ടിയെടുത്ത പണം ദിവസേന രഞ്ജു സാജിന്റെ ബാങ്ക് അക്കൗണ്ടിലേക്ക് മാറ്റുന്നതായിരുന്നു രീതി.
സംശയം തോന്നിയ ഉടമ നടത്തിയ നിരീക്ഷണത്തിലാണ് തട്ടിപ്പ് വ്യക്തമായത്. ഇതേതുടര്‍ന്ന് പൊലീസില്‍ പരാതി നല്‍കി. തട്ടിപ്പ് പുറത്തായെന്ന് മനസിലാക്കിയ സനമോള്‍ വിദേശത്തേക്ക് കടന്നു.
പൊലീസ് ഇവര്‍ക്കെതിരെ ലുക്ക് ഔട്ട് നോട്ടീസ് പുറപ്പെടുവിച്ചു.ഇതോടെ നേപ്പാള്‍ വഴി സനമോള്‍ കൊച്ചിയിലെത്തിയപ്പോഴാണ് പിടിയിലായത്. അറസ്റ്റ് രേഖപ്പെടുത്തിയ പ്രതികളെ കോടതിയില്‍ ഹാജരാക്കി റിമാന്‍ഡ് ചെയ്തു.
