മനുഷ്യരില് നിന്നല്ലാതെ മരണമില്ലെന്ന വരം കഠിനതപസ്സിലൂടെ ബ്രഹ്മാവില് നിന്നു സിദ്ധിച്ചയാളാണു രാവണന്. അഹന്ത പെരുക്കാന് മറ്റെന്തുവേണം കരുത്തനായ രാക്ഷസരാജന് ! ഭൂമിക്കു ഭാരമായിത്തീര്ന്ന രാക്ഷസശക്തികളില്നിന്നു ലോകത്തെ രക്ഷിക്കാന് മണ്ണില് മനുഷ്യാവതാരം സ്വീകരിക്കേണ്ടതുണ്ട് ഭഗവാന്.
ഭൂമീദേവി ഗോരൂപം പൂണ്ട് ദേവതാപസഗണത്തോടൊപ്പം ബ്രഹ്മാവിനു മുന്നിലാണ് സങ്കടമറിയിക്കാനെത്തുന്നത്. വേദനായകനായ നാഥന് മഹാവിഷ്ണുവിനെ സമീപിക്കാനാണ് ബ്രഹ്മാവിന്റെ തീരുമാനം.
ഭക്തിഭാവഭരിതമായി ഭഗവാനെ സ്തുതിച്ച് സങ്കടങ്ങള് ഉണര്ത്തിക്കുന്നതിന് അദ്ദേഹംതന്നെ നേതൃത്വവും നല്കുന്നു.
പുത്രലാഭാര്ഥം ഏറെക്കാലം വിഷ്ണുഭഗവാനെ സേവിച്ചയാളാണ് കശ്യപ പ്രജാപതി. പ്രജാപതികളില് പ്രധാനിയായ അദ്ദേഹം ഇപ്പോള് ദശരഥനാമധാരിയായി ഭൂമിയിലുണ്ട്. ദേശത്തെ ദിവ്യന് തന്നെ ദശരഥന്. അദ്ദേഹത്തിന്റെ പത്നിയായ കൗസല്യയാകട്ടെ ആദിശക്തിയുടെ അവതാരം തന്നെയും. ഭഗവാന് മണ്ണിലവതരിക്കാന് ഇതിലും നല്ല സാന്നിധ്യങ്ങള് മറ്റെന്തു വേണം ?!
പുത്രലാഭാലോചനയുടെ ഉള്ത്താപത്തിലാണ് ദശരഥന്. ഗുരുസ്ഥാനത്ത് മഹാജ്ഞാനിയായ വസിഷ്ഠ മഹര്ഷിയുണ്ട്.
വിഭാണ്ഡകപുത്രനായ ഋശ്യശൃംഗനെ വരുത്തി പുത്രകാമേഷ്ടി അനുഷ്ഠിച്ചാല് നാലു സല്പുത്രന്മാര് പിറക്കുമെന്നാണ് തപോധനനായ ഗുരുവില്നിന്ന് രാജാവിനു ലഭിക്കുന്ന ഉപദേശം. വരുംകാലത്തെ കാണാന് കഴിയുക എന്നത് ലഘുവായ സംഗതിയല്ലതന്നെ; അതാണ് ഒരാളെ ഗുരുവാക്കുന്നതും.
ജന്മഭൂമി ഓണ്ലൈന്