തൃശൂര്: അമല ആശുപ്രതിയില് യുണൈറ്റഡ് നേഴ്സസ് അസോസിയേഷന് നടത്തിയ ഉപരോധ സമരം അവസാനിച്ചു. ഏകദേശം 30 മണിക്കൂറിന് ശേഷമാണ് ഉപരോധം അവസാനിച്ചത്.
16ന് രാവിലെ 10 മണിയോടെയാണ് 500ല് ഏറെ യുഎന്എ പ്രവര്ത്തകര് ആശുപത്രിയുടെ പ്രധാന കവാടത്തിലും വരാന്തയിലും ഉപരോധം തുടങ്ങിയത്. സമരത്തിനിടെ ആശുപത്രി മാനേജ്മെന്റും യുഎന്എ നേതൃത്വവും തമ്മില് ധാരണയോ ഒത്തുതീര്പ്പോ ഉണ്ടായിട്ടില്ലെന്ന് ആശുപത്രി അധികൃതര് പറഞ്ഞു.
ഉപരോധം അവസാനിപ്പിച്ചതിന് പിന്നില് മാനേജ്മെന്റിന്റെ പുതിയ വാഗ്ദാനങ്ങളോ തീരുമാനങ്ങളോ ഇല്ലെന്നും ആശുപത്രി അധികൃതര് വാര്ത്താ കുറിപ്പില് അറിയിച്ചു. ആശുപത്രിയുടെ ദൈനംദിന പ്രവര്ത്തനങ്ങളും സേവനങ്ങളും തടസപ്പെടുത്തിയതായി കാണിച്ച് ആശുപത്രി അധികൃതര് പേരാമംഗലം പൊലീസ് സ്റ്റേഷനില് പരാതി നല്കിയിരുന്നു.
ആശുപത്രിയുടെ പ്രവര്ത്തനങ്ങള് തടസമില്ലാതെ മുന്നോട്ടു കൊണ്ടുപോകുന്നതിനും ജീവനക്കാര്ക്ക് സുരക്ഷ ഉറപ്പാക്കുന്നതിനുമായി ആവശ്യമായ പൊലീസ് സഹായം നല്കണമെന്ന് കേരള ഹൈക്കോടതി ഉത്തരവിട്ടിരുന്നു. സംഭവവുമായി ബന്ധപ്പെട്ട നിയമനടപടികളും കോടതി ഉത്തരവിന്റെ തുടര്നടപടികളും ബന്ധപ്പെട്ട അധികാരികളുടെ പരിഗണനയിലാണെന്ന് ആശുപ്രതി അധികൃതര് വാര്ത്താക്കുറിപ്പില് അറിയിച്ചു.
