ന്യൂദല്ഹി: നിരാഹാര സമരം നടത്തുന്ന സോനം വാങ്ചുകിന്റെ ആരോഗ്യസ്ഥിതി സര്ക്കാര് ഡോക്ടര്മാര് ദിവസവും നിരീക്ഷിക്കുന്നുണ്ടെന്നും ജീവന് രക്ഷിക്കാന് എല്ലാ മെഡിക്കല് ശ്രമങ്ങളും നടത്തുന്നുണ്ടെന്നും കേന്ദ്ര, ദല്ഹി സര്ക്കാരുകള് ഹൈക്കോടതിയെ അറിയിച്ചു. കേന്ദ്ര വിദ്യാഭ്യാസ മന്ത്രി ധര്മ്മേന്ദ്ര പ്രധാന്റെ രാജി ആവശ്യപ്പെട്ട് ദല്ഹിയിലെ ജന്തര് മന്തറില് നിരാഹാര സമരം നടത്തുന്ന സോനം വാങ്ചുക്കിന്റെ ജീവന് രക്ഷിക്കാന് അടിയന്തര ഇടപെടല് ആവശ്യപ്പെട്ട് സമര്പ്പിച്ച ഹര്ജിയിലാണ് സര്ക്കാര് ഇക്കാര്യം വ്യക്തമാക്കിയത്.
‘വാങ്ചുകിന്റെ ആരോഗ്യസ്ഥിതി സര്ക്കാര് ഡോക്ടര്മാര് ദിവസേന നിരീക്ഷിക്കുമെന്ന് സോളിസിറ്റര് ജനറല് തുഷാര് മേത്ത വ്യക്തമാക്കിയിട്ടുണ്ട്. ഏതൊരു പൗരന്റെയും ജീവന് വിലപ്പെട്ടതാണെന്നും അത് രക്ഷിക്കാന് സര്ക്കാര് അധികാരികള് എല്ലാ ശ്രമങ്ങളും നടത്തണമെന്നും മാത്രമാണ് ഞങ്ങള് ഉദ്യേശിക്കുന്നത്. സോളിസിറ്റര് ജനറല് സ്വീകരിച്ച നിലപാടിനെ ഞങ്ങള് അഭിനന്ദിക്കുന്നു, അതനുസരിച്ച് വാങ്ചുകിന്റെ ആരോഗ്യസ്ഥിതി, ക്ലിനിക്കലായും അല്ലാതെയും, ദിവസേന പതിവായി നിരീക്ഷിക്കണമെന്ന് നിര്ദ്ദേശിക്കുന്നു,’ ചീഫ് ജസ്റ്റിസ് ദേവേന്ദ്ര കുമാര് ഉപാധ്യായ , ജസ്റ്റിസ് തേജസ് കരിയ എന്നിവരടങ്ങിയ ബെഞ്ച് പറഞ്ഞു.
കോക്രോച്ച് പാര്ട്ടിയുടെ (സിജെപി) പ്രതിഷേധത്തില് പങ്കെടുത്തതിനെത്തുടര്ന്ന് ജൂണ് 28 മുതല് വാങ്ചുക് അനിശ്ചിതകാല നിരാഹാര സമരത്തിലാണ്. സമരം എങ്ങിനെയും അവസാനിപ്പിക്കാനുള്ള ശ്രമങ്ങളുടെ ഭാഗമായാണ് പാര്ട്ടി കോടതിയെ ആശ്രയിച്ചത്.
