ഹരിപ്പാട്: ഉസ്ബക്കിസ്ഥാനില് മെഡിക്കല് വിദ്യാര്ത്ഥിനി സാവരിയ ബസന്ത് കൊല്ലപ്പെട്ട സംഭവത്തില് സംസ്ഥാന സര്ക്കാര്, കേന്ദ്ര സര്ക്കാരുമായി ബന്ധപ്പെട്ട് ഏകോപനം നടത്തണമെന്ന് വി. മുരളീധരന് എംഎല്എ ആവശ്യപ്പെട്ടു. ഇതിനായി മുഖ്യമന്ത്രി വി. ഡി. സതീശന് മുന്കൈ എടുക്കണം. കുടുംബത്തിന് നീതി ഉറപ്പാക്കാന് ബിജെപി പ്രതിജ്ഞാബദ്ധമാണെന്ന് അദ്ദേഹം പറഞ്ഞു.
കുടുംബത്തിന് ആവശ്യമായ എല്ലാ സഹായങ്ങളും ബിജെപി നല്കും. സാവരിയയുടെ വീട് സന്ദര്ശിച്ച ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം.
കൊലപാതകത്തില് കുടുംബം ഉന്നയിക്കുന്ന ആരോപണങ്ങള് അതീവ ഗൗരവത്തോടെ അന്വേഷിക്കപ്പെടണം. മതംമാറ്റത്തിന് നിര്ബന്ധിച്ചുള്ള മാനസിക, ശാരീരിക പീഡനമാണ് കൊലപാതകത്തിലേക്ക് നയിച്ചതെന്ന പരാതി ഗൗരവത്തിലെടുത്ത് അന്വേഷണം കേന്ദ്ര ഏജന്സിക്ക് കൈമാറണം. മക്കളെ വിദേശത്തേക്ക് പഠിക്കാന് അയക്കുന്ന രക്ഷിതാക്കളുടെ ആശങ്ക അകറ്റാന് സര്ക്കാര് അടിയന്തര നടപടികള് കൈക്കൊള്ളണം. മലയാളികളായ ഒട്ടനവധി വിദ്യാര്ത്ഥികളാണ് അവിടെ പഠിക്കാന് പോയിട്ടുള്ളത്. അവരുടെ സുരക്ഷയെ പറ്റിയും ആശങ്ക ഉയര്ത്തുന്നതാണ് ഈ കൊലപാതകം.
ഇപ്പോള് അന്വേഷണം ഏല്പ്പിച്ചിട്ടുള്ള സ്റ്റേറ്റ് ക്രൈംബ്രാഞ്ച് പ്രാഥമിക അന്വേഷണം പൂര്ത്തിയാക്കിയ ശേഷം സംസ്ഥാന സര്ക്കാര് തന്നെ കേന്ദ്ര സര്ക്കാരുമായി ആലോചിച്ച് കേന്ദ്ര ഏജന്സിയുടെ അന്വേഷണം ഉറപ്പുവരുത്തണമെന്നും അദ്ദേഹം ആവശ്യപ്പെട്ടു. ബിജെപി ജില്ലാ അധ്യക്ഷന് സന്ദീപ് വാചസ്പതി, സംസ്ഥാന ഉപാധ്യക്ഷന് കെ. സോമന്, സംസ്ഥാന സെക്രട്ടറി എം.വി. ഗോപകുമാര്, മണ്ഡലം പ്രസിഡന്റ് പി. സുമേഷ്, ജനറല് സെക്രട്ടറി ജി. എസ്. ബൈജു എന്നിവര് ഒപ്പമുണ്ടായിരുന്നു.
