ടെഹ്റാന്‍: ഇറാനിലെ ഹോര്‍മുസ് കടലിടുക്ക് പിടിച്ചെടുത്തതായി പ്രഖ്യാപിച്ച് ട്രംപ്. ട്രൂത്ത് സോഷ്യലില്‍ പങ്കുവെച്ച പോസ്റ്റിലാണ് ഈ പ്രഖ്യാപനം. ഇനി ഹോര്‍മുസിലൂടെ കടന്നുപോകുന്ന ചരക്കുകപ്പലുകള്‍ക്ക് ഫീസ് ഈടാക്കമെന്നും ട്രംപ്.
ഹോര്‍മുസ് കടലിടുക്ക് അടച്ചതായി കഴിഞ്ഞ ദിവസം ഇറാന് പ്രഖ്യാപിച്ചതിന് തൊട്ടുപിന്നാലെയാണ് ട്രംപിന്റെ ഈ പ്രഖ്യാപനം. ഇതോടെ ഹോര്‍മുസ് വഴിയുള്ള കപ്പല്‍ ഗതാഗതം പാടെ തടസ്സപ്പെടുമെന്ന് ഉറപ്പായി. ആക്രമണം ഭയന്ന് ഒരു രാജ്യവും ചരക്ക് കപ്പലുകള്‍ ഉപയോഗിക്കാന്‍ സാധ്യതയില്ല. ഇതോടെ എണ്ണവില വീണ്ടും ഉയര്‍ന്നു തുടങ്ങി.
ഇന്ത്യയ്‌ക്ക് തിരിച്ചടിയാകും
ഇന്ത്യയുടെ എണ്ണക്കപ്പലുകള്‍ ഇതോടെ ഹോര്‍മുസ് കടലിടുക്ക് വഴി വരാനുള്ള സാധ്യത അടഞ്ഞിരിക്കുകയാണ്. പ്രത്യേകിച്ചും യുഎസ് ഹോര്‍മുസ് കടലിടുക്ക് പിടിച്ചെടുത്തു എന്ന് പ്രഖ്യാപിച്ച സ്ഥിതിക്ക് ഇന്ത്യന്‍ കപ്പലുകള്‍ കടന്നുപോയാല്‍ ആക്രമണമുണ്ടാകുമെന്ന് ഉറപ്പാണ്. നേരത്തെ പലപ്പോഴും ഇന്ത്യയുടെ കപ്പലുകള്‍ക്ക് നേരെ അമേരിക്ക ആക്രമണം നടത്തിയിരുന്നു. എന്തിന് ഇറാനില്‍ ഇന്ത്യ കെട്ടിപ്പൊക്കിയ ഛാബഹാര്‍ തുറമുഖത്തിന് നേരെ വരെ അമേരിക്ക ആക്രമണം നടത്തിയിരുന്നു. ഇതോടെ ഇന്ത്യയില്‍ വീണ്ടും എണ്ണ, വാതക പ്രതിസന്ധി രൂക്ഷമാകും.
ഇറാന്റെ ആണവനിലയങ്ങളെ ആക്രമിച്ചാല്‍ തിരിച്ചടിക്കുമെന്ന് റഷ്യ, വരുമോ ലോകയുദ്ധം
അതിനിടെ ഞായറാഴ്ച രാത്രിയില്‍ ഹോര്‍മുസ് കടലിടുക്കില്‍ ഇറാന്റെ വ്യോമപ്രതിരോധ സംവിധാനങ്ങള്‍ക്ക് നേരെ യുഎസ് മിസൈലാക്രമണം നടത്തിയിരുന്നു. എന്നാല്‍ ഇറാന്റെ ആണവകേന്ദ്രങ്ങളെ ആക്രമിച്ചാല്‍ തിരിച്ചടിക്കുമെന്ന് റഷ്യ പ്രഖ്യാപിച്ചിരിക്കുകയാണ്. ഇതിന് പിന്നാലെ ഇറാന്റെ സേനയായ ഐആര്‍ജിസിയെ തീവ്രവാദസംഘടനയായി ബ്രിട്ടന്‍ പ്രഖ്യാപിച്ചു. ഇതോടെ ഇറാന് യുദ്ധം ഒരു ലോകമഹായുദ്ധത്തിലേക്ക് നീങ്ങുമോ എന്ന ആശങ്ക ഉയരുകയാണ്. അതേ സമയം, അമേരിക്കയുടെ കടുത്ത സാമ്പത്തിക ഉപരോധം കാരണം ഇറാനിലെ സാധാരണ ജനജീവിതം ദുരിതപൂര്‍ണ്ണമായിരിക്കുകയാണ്. സാധനങ്ങള്‍ക്ക് കൂത്തനെ വില ഉയര്‍ന്നിരിക്കുകയാണ്. സാധാരണക്കാരുടെ കയ്യില്‍ പണം ആവശ്യത്തിനില്ല. എണ്ണ വിറ്റ പണം പോലും ഇറാന് ലഭിക്കാത്ത സാഹചര്യം നിലനില്‍ക്കുന്നുണ്ട്.
