മട്ടാഞ്ചേരി: ആഴക്കടലില്‍ ശത്രുരാജ്യങ്ങളുടെ രഹസ്യ അന്തര്‍വാഹിനികള്‍ കണ്ടെത്താനും നിരീക്ഷിക്കാനുമുള്ള പദ്ധതിക്ക് ഭാരതം ഒരുങ്ങുന്നു.
ഒപ്റ്റിക്കല്‍ കേബിള്‍ ശൃംഖലയൊരുക്കുന്ന പദ്ധതിക്ക് നാവിക ലബോറട്ടറിയായ കൊച്ചി എന്‍പിഒഎല്‍ ആണ് നേതൃത്വം നല്‍കുന്നത്. ആഗോള തലത്തില്‍ അമേരിക്ക, ചൈന എന്നിവക്ക് പുറമേ ഭാരതം ഏറ്റെടുത്ത പദ്ധതിയാണിത്. രാജ്യ സുരക്ഷയ്‌ക്കൊപ്പം ആധുനിക ശാസ്ത്ര രംഗത്തെ നാവിക സേനാ മുന്നേറ്റമായാണ് പദ്ധതിയെ വിലയിരുത്തുന്നത്. നിലവില്‍ ഇന്ത്യന്‍ മഹാസമുദ്രത്തില്‍ ചൈന – പാക് അന്തര്‍വാഹിനികളുടെ സാന്നിധ്യവും വെല്ലുവിളികളും ഏറിയ സാഹചര്യത്തിലാണ് പ്രതിരോധ മേഖലയിലെ ഡിആര്‍ഡിഎയുടെ കൊച്ചി ലബോറട്ടറിക് പദ്ധതി നേതൃത്വം ലഭിച്ചത്.
ആഴക്കടലില്‍ അടിത്തട്ടില്‍ സെന്‍സര്‍ നോഡുകള്‍ സ്ഥാപിച്ച് ഫൈബര്‍ ഒപ്റ്റിക്കല്‍ കേബിള്‍ ശൃംഖല വഴി കരയിലുള്ള നിരീക്ഷണ കേന്ദ്രവുമായി ബന്ധിപ്പിച്ച് ശത്രു അന്തര്‍വാഹിനികളെ തിരിച്ചറിഞ്ഞ് നാവിക സേനാ കപ്പലുകളും വിമാനങ്ങളും ലക്ഷ്യസ്ഥാനത്ത് പ്രവര്‍ത്തനസജ്ജമാക്കുന്ന ദൗത്യമാണിത്. അണ്ടര്‍ വാട്ടര്‍ ഫൈബര്‍ ഒപ്റ്റിക് സെന്‍സിങ് സിസ്റ്റം എന്നറിയപ്പെടുന്ന പദ്ധതി നാവികസേനയ്‌ക്ക് വന്‍കരുത്തായി മാറും. ആഴക്കടലില്‍ 24 മണിക്കുറും നിരീക്ഷണമൊരുക്കുന്ന ഒപ്റ്റിക് കേബിള്‍ ശൃംഖല ഇന്ത്യന്‍ മഹാസമുദ്രത്തിലാണ് ആദ്യഘട്ടമായി ഒരുക്കുന്നത്. രണ്ടു വര്‍ഷത്തിനകം പ്രവര്‍ത്തന സജ്ജമാക്കുന്ന കര്‍മ്മ പദ്ധതിയായാണ് പ്രതിരോധ വകുപ്പ് രൂപം നല്‍കിയിരിക്കുന്നത്.
കൊച്ചിയിലെ നേവല്‍ ഫിസിക്കല്‍ ഓഷ്യാനോഗ്രഫിക് ലാബട്ടറി (എന്‍പിഒഎല്‍) നേതൃത്വം നല്‍കുന്ന പദ്ധതി നിര്‍മാണം, വിന്യാസം, നടപ്പിലാക്കല്‍ (കമ്മീഷനിങ്) എന്നിവയ്‌ക്കായുള്ള നടപടികള്‍ തുടങ്ങി.
സമുദ്ര മേഖലയില്‍ കപ്പല്‍വിമാന നിരീക്ഷണ പരിമിതികള്‍ തിരിച്ചറിഞ്ഞും ചൈനയുടെ അന്തര്‍വാഹിനി കടന്നു കയറ്റവും പാക്കിസ്ഥാന്റെ ഇന്‍ഡിപെന്‍ഡന്റ് അന്തര്‍വാഹിനി സാന്നിദ്ധ്യവും വെല്ലുവിളികളും ഏറ്റെടുത്തുള്ളപ്രതിരോധ നടപടിയാണ് ആഴക്കടല്‍ രഹസ്യ കണ്ണ് എന്ന ഭാരതത്തിന്റെ അത്യാധുനിക സെന്‍സര്‍ ശൃംഖല പദ്ധതി.
ജന്മഭൂമി ഓണ്‍ലൈന്‍