റായ്പുര്: വിദ്യാലയങ്ങളില് ഗായത്രി മന്ത്രവും സരസ്വതി മന്ത്രവും ഗുരു മന്ത്രവും മറ്റും ചൊല്ലണമെന്ന സര്ക്കാര് ഉത്തരവിനെതിരെ നല്കിയ ഹര്ജി ഛത്തീസ്ഗഡ് ഹൈക്കോടതി തള്ളി. ഹര്ജി അപക്വമാണെന്ന് ചൂണ്ടിക്കാട്ടിയ ജസ്റ്റിസ് അമിതേന്ദ്ര കിഷോര് പ്രസാദ്, സര്ക്കാര് നിര്ദേശം മൗലികാവകാശങ്ങളുടെ എന്ത് ലംഘനമാണ് നടത്തിയതെന്ന് വ്യക്തമാക്കാന് ഹര്ജിക്കാരന് സാധിച്ചില്ലെന്നും ചൂണ്ടിക്കാട്ടി. ഇവ പാടാന് വിദ്യാര്ത്ഥികളെ നിര്ബന്ധിച്ച ഒരുദാഹരണം കാണിക്കാനും കഴിഞ്ഞില്ല, ജസ്റ്റിസ് പറഞ്ഞു. സര്ക്കാര് ഉത്തരവ് ആരുടെയെങ്കിലും മതസ്വാതന്ത്ര്യത്തില് കടന്നുകയറുന്നില്ല. ഇവ പാടാന് നിര്ബന്ധിക്കുന്നുമില്ല. ഇവയുടെ ആലാപനം നിര്ബന്ധമാക്കിയിട്ടില്ല.
സര്ക്കാര് ധനസഹായത്തില് പ്രവര്ത്തിക്കുന്ന വിദ്യാലയങ്ങളില് മതബോധനം വിലക്കുന്ന ഭരണഘടനയുടെ 28(1) വകുപ്പ് ഉത്തരവ് വഴി സര്ക്കാര് ലംഘിച്ചിട്ടുമില്ല. ഭരണഘടനയുടെ ഈ വകുപ്പ് വിദ്യാലയങ്ങളിലെ ധാര്മിക പാഠങ്ങള് വിലക്കിയിട്ടുമില്ല. മതാചാരങ്ങളും ആരാധനയുമൊക്കെയാണ് വിലക്കിയിട്ടുള്ളത്. ഇവ ഭാവിയില് നിര്ബന്ധമാക്കിയാല് ഹര്ജിക്കാരന് കോടതിയെ വീണ്ടും സമീപിക്കാം. ജസ്റ്റിസ് വ്യക്തമാക്കി.
